تکتے ہیں کتنے غور سے اہل زمیں مجھے

تکتے ہیں کتنے غور سے اہل زمیں مجھے

بھیجا گیا ہے وقت سے پہلے کہیں مجھے

آیا ہوں جب سے دشت سے واپس پلٹ کے میں

حسرت سے دیکھتے ہیں یہاں سب مکیں مجھے

اب خوشبوؤں کا مجھ کو سفر راس ہی نہیں

دکھلائیو نہ کوئی بھی خواب حسیں مجھے

اک خواب کا خمار کبھی ٹوٹتا نہیں

اک لمحۂ نشاط میسر نہیں مجھے

مجھ سے کوئی جہاں بھی ملا یاد ہے مجھے

رہتے ہیں نقش یاد سبھی اولیں مجھے

لے جا سبھی چراغ بھی اپنے سمیٹ کر

اب روشنی کی کوئی ضرورت نہیں مجھے

جامیؔ میں اپنی جان بصد شوق وار دوں

ہر چیز سے عزیز ہے یہ سرزمیں مجھے