talwar se kaTa hai phulon-bhari Dalon ko

talvār se kaaTā hai phūloñ-bharī Dāloñ ko

duniyā ne nahīñ chāhā ham chāhne vāloñ ko

maiñ aag thā phūloñ meñ tabdīl huā kaise

bachchoñ kī tarah chūmā us ne mire gāloñ ko

aḳhlāq vafā chāhat sab qīmtī kapḌe haiñ

har roz na oḌhā kar in reshmī shāloñ ko

barsāt kā mausam to lahrāne kā mausam hai

uḌne do havāoñ meñ bikhre hue bāloñ ko

chiḌiyoñ ke liye chāval paudoñ ke liye paanī

thoḌī sī mohabbat de ham chāhne vāloñ ko

ab raakh baToreñge alfāz ke saudāgar

maiñ aag pe rakh dūñgā nāyāb risāloñ ko

maulā mujhe paanī de maiñ ne nahīñ māñgā thā

chāñdī kī surāhī ko sone ke piyāloñ ko

talwar se kaTa hai phulon-bhari Dalon ko

duniya ne nahin chaha hum chahne walon ko

main aag tha phulon mein tabdil hua kaise

bachchon ki tarah chuma us ne mere galon ko

aKHlaq wafa chahat sab qimti kapDe hain

har roz na oDha kar in reshmi shaalon ko

barsat ka mausam to lahrane ka mausam hai

uDne do hawaon mein bikhre hue baalon ko

chiDiyon ke liye chawal paudon ke liye pani

thoDi si mohabbat de hum chahne walon ko

ab rakh baTorenge alfaz ke saudagar

main aag pe rakh dunga nayab risalon ko

maula mujhe pani de main ne nahin manga tha

chandi ki surahi ko sone ke piyalon ko