tere kuche mein jo hum ba-dida-e-tar baiThte

tere kūche meñ jo ham bā-dīda-e-tar baiThte

josh-e-tūfāñ se zamīñ meñ saiñkaḌoñ ghar baiThte

chārāgar bhī ham-nashīñ thā raat ko nāseh bhī thā

varna betābi se ham kyā jaane kyā kar baiThte

ho ga.ī mahfil tirī kyā be-adab be-qā.ida

jo khaḌe rahte the vo ab haiñ barābar baiThte

jab kiyā shikva ki mahfil meñ rahe ham tum se duur

us ne jhuñjhlā kar kahā kyā mere sar par baiThte

jis kī qismat meñ ho gardish kis tarah baiThe kahīñ

ham se āvāra tire kūche meñ kyūñkar baiThte

'dāġh' tum ne kyoñ kiyā hai naam vahshat kā ḳharāb

is se to behtar yahī thā chain se ghar baiThte

tere kuche mein jo hum ba-dida-e-tar baiThte

josh-e-tufan se zamin mein sainkaDon ghar baiThte

chaaragar bhi ham-nashin tha raat ko naseh bhi tha

warna betabi se hum kya jaane kya kar baiThte

ho gai mahfil teri kya be-adab be-qaida

jo khaDe rahte the wo ab hain barabar baiThte

jab kiya shikwa ki mahfil mein rahe hum tum se dur

us ne jhunjhla kar kaha kya mere sar par baiThte

jis ki qismat mein ho gardish kis tarah baiThe kahin

hum se aawara tere kuche mein kyunkar baiThte

'dagh' tum ne kyon kiya hai nam wahshat ka KHarab

is se to behtar yahi tha chain se ghar baiThte