uData raundta har rah-e-kaif-o-kam nikla

uḌātā rauñdtā har rāh-e-kaif-o-kam niklā

pas-e-ġhubār-e-nafas shah-savār-e-ġham niklā

har ik numūd meñ shāmil thā vahm-e-jabr kā lutf

har ik vujūd 'azā-ḳhāna-e-karam niklā

sunā to ye thā jahān-e-digar hai terā dayār

magar har ek yahāñ kushta-e-sitam niklā

tamām kūcha-o-bāzār dast-basta the

kuchh is adā se mire 'ishq kā 'alam niklā

chalā thā ruuh se milne vo dil-zada miskīñ

magar ġharīb kā rāh-e-badan meñ dam niklā

koī jagah na milī māvarā-e-sūd-o-ziyāñ

har ik maqām pe imkān-e-besh-o-kam niklā

uData raundta har rah-e-kaif-o-kam nikla

pas-e-ghubar-e-nafas shah-sawar-e-gham nikla

har ek numud mein shamil tha wahm-e-jabr ka lutf

har ek wujud 'aza-KHana-e-karam nikla

suna to ye tha jahan-e-digar hai tera dayar

magar har ek yahan kushta-e-sitam nikla

tamam kucha-o-bazar dast-basta the

kuchh is ada se mere 'ishq ka 'alam nikla

chala tha ruh se milne wo dil-zada miskin

magar gharib ka rah-e-badan mein dam nikla

koi jagah na mili mawara-e-sud-o-ziyan

har ek maqam pe imkan-e-besh-o-kam nikla