wahshat thi hum the saya-e-diwar-e-yar tha

vahshat thī ham the sāya-e-dīvār-e-yār thā

yā ye kaho ki sar pe koī jin savār thā

bigḌā chaman meñ kal tire vahshī kā jab mizāj

jhoñkā nasīm kā bhī use nāgavār thā

laale kā daaġh dekh ke chitvan badal ga.ī

tevar se saaf rāz-e-junūñ āshkār thā

pahle to āñkheñ phaaḌ ke dekhā idhar-udhar

dāman phir ik ishāre meñ bas tār-tār thā

allāh re toḌ nīchī nigāhoñ ke tiir kā

uf bhī na karne paa.e the aur dil ke paar thā

nairañg-e-husn o ishq kī vo āḳhirī bahār

turbat thī merī aur koī ashk-bār thā

jhuk-jhuk ke dekhtā hai falak aaj tak use

jis sarzamīñ pe merā nishān-e-mazār thā

sāhil ke paas 'yās' ne himmat bhī haar dī

kuchh haath paañv mārtā zālim to paar thā

wahshat thi hum the saya-e-diwar-e-yar tha

ya ye kaho ki sar pe koi jin sawar tha

bigDa chaman mein kal tere wahshi ka jab mizaj

jhonka nasim ka bhi use nagawar tha

lale ka dagh dekh ke chitwan badal gai

tewar se saf raaz-e-junun aashkar tha

pahle to aankhen phaD ke dekha idhar-udhar

daman phir ek ishaare mein bas tar-tar tha

allah re toD nichi nigahon ke tir ka

uf bhi na karne pae the aur dil ke par tha

nairang-e-husn o ishq ki wo aaKHiri bahaar

turbat thi meri aur koi ashk-bar tha

jhuk-jhuk ke dekhta hai falak aaj tak use

jis sarzamin pe mera nishan-e-mazar tha

sahil ke pas 'yas' ne himmat bhi haar di

kuchh hath panw marta zalim to par tha