wo gul nahin to gulon mein bhi dilkashi na rahi

vo gul nahīñ to guloñ meñ bhī dilkashī na rahī

bahār meñ bhī vo pahlī sī baat hī na rahī

tumhāre baad kahāñ ab vo lutf-e-aish-o-nishāt

tumhāre jaane se baaqī koī ḳhushī na rahī

ḳhudā ke fazl se pahuñchā hai is maqām pe ishq

tumhārī yaad bhī dil meñ rahī rahī na rahī

vo jab bhī baam par aa kar hue haiñ jalva-fagan

falak ke chāñd sitāroñ meñ raushnī na rahī

ilāhī ḳhair ye kyā inqilāb aaya hai

ki dostoñ meñ bhī ab rasm-e-dostī na rahī

dikhā.e dāġh-e-dil un ko jo ham ne mahfil meñ

phir is ke baad charāġhoñ meñ raushnī na rahī

kahāñ hai pīr-e-muġhāñ mai-kada hai suunā sā

vo us kī shaan vo shaukat vo baat hī na rahī

bahār aate hī hañsne lage ḳhushī se phuul

kareñge kyā jo chaman meñ bahār hī na rahī

biThāyā ham ko bhī mahfil meñ saath ġhairoñ ke

chalo hameñ bhī shikāyat to aap kī na rahī

hamīñ the vo jo na laa.e kabhī zabāñ pe gila

tumhāre jaur meñ lekin koī kamī na rahī

shikāyat un kī kareñ be-ḳhudī meñ kyā 'gauhar'

ḳhabar hameñ bhī to ab apne haal kī na rahī

wo gul nahin to gulon mein bhi dilkashi na rahi

bahaar mein bhi wo pahli si baat hi na rahi

tumhaare baad kahan ab wo lutf-e-aish-o-nishat

tumhaare jaane se baqi koi KHushi na rahi

KHuda ke fazl se pahuncha hai is maqam pe ishq

tumhaari yaad bhi dil mein rahi rahi na rahi

wo jab bhi baam par aa kar hue hain jalwa-fagan

falak ke chand sitaron mein raushni na rahi

ilahi KHair ye kya inqilab aaya hai

ki doston mein bhi ab rasm-e-dosti na rahi

dikhae dagh-e-dil un ko jo hum ne mahfil mein

phir is ke baad charaghon mein raushni na rahi

kahan hai pir-e-mughan mai-kada hai suna sa

wo us ki shan wo shaukat wo baat hi na rahi

bahaar aate hi hansne lage KHushi se phul

karenge kya jo chaman mein bahaar hi na rahi

biThaya hum ko bhi mahfil mein sath ghairon ke

chalo hamein bhi shikayat to aap ki na rahi

hamin the wo jo na lae kabhi zaban pe gila

tumhaare jaur mein lekin koi kami na rahi

shikayat un ki karen be-KHudi mein kya 'gauhar'

KHabar hamein bhi to ab apne haal ki na rahi