wo husn jis ko dekh ke kuchh bhi kaha na jae

vo husn jis ko dekh ke kuchh bhī kahā na jaa.e

dil kī lagī usī se kahe bin rahā na jaa.e

kyā jaane kab se dil meñ hai apne basā huā

aisā nagar ki jis meñ koī rāsta na jaa.e

dāman rafū karo ki bahut tez hai havā

dil kā charāġh phir koī aa kar bujhā na jaa.e

nāzuk bahut hai rishta-e-dil tez mat chalo

dekho tumhāre haath se ye silsila na jaa.e

hai koī khel jaan gañvāne kā hausla

ḳhair ab jo aa gayā hai to ye marhala na jaa.e

ik vo bhī haiñ ki ġhair kā bunte haiñ jo kafan

ik ham ki apnā chāk-garebāñ siyā na jaa.e

wo husn jis ko dekh ke kuchh bhi kaha na jae

dil ki lagi usi se kahe bin raha na jae

kya jaane kab se dil mein hai apne basa hua

aisa nagar ki jis mein koi rasta na jae

daman rafu karo ki bahut tez hai hawa

dil ka charagh phir koi aa kar bujha na jae

nazuk bahut hai rishta-e-dil tez mat chalo

dekho tumhaare hath se ye silsila na jae

hai koi khel jaan ganwane ka hausla

KHair ab jo aa gaya hai to ye marhala na jae

ek wo bhi hain ki ghair ka bunte hain jo kafan

ek hum ki apna chaak-gareban siya na jae