wo KHuda hai ki sanam hath laga kar dekhen

vo ḳhudā hai ki sanam haath lagā kar dekheñ

aaj us shaḳhs ko nazdīk bulā kar dekheñ

ek jaise haiñ sabhī gul-badanoñ ke chehre

kis ko tashbīh kā ā.īna dikhā kar dekheñ

kyā ta'ajjub koī tā'bīr dikhā.ī de jaa.e

ham bhī āñkhoñ meñ koī ḳhvāb sajā kar dekheñ

jism ko jism se milne nahīñ detī kam-baḳht

ab takalluf kī ye dīvār girā kar dekheñ

ḳhair dillī meñ to aurāq-e-musavvar the bahut

laao is shahr kī galiyoñ meñ bhī jā kar dekheñ

kaun aatā hai yahāñ tez havāoñ ke sivā

apnī dahlīz pe ik sham' jalā kar dekheñ

vo samajhtā hai ye andāz-e-taḳhātub ki nahīñ

ye ġhazal us ġhazal-ārā ko sunā kar dekheñ

wo KHuda hai ki sanam hath laga kar dekhen

aaj us shaKHs ko nazdik bula kar dekhen

ek jaise hain sabhi gul-badanon ke chehre

kis ko tashbih ka aaina dikha kar dekhen

kya ta'ajjub koi ta'bir dikhai de jae

hum bhi aankhon mein koi KHwab saja kar dekhen

jism ko jism se milne nahin deti kam-baKHt

ab takalluf ki ye diwar gira kar dekhen

KHair dilli mein to auraq-e-musawwar the bahut

lao is shahr ki galiyon mein bhi ja kar dekhen

kaun aata hai yahan tez hawaon ke siwa

apni dahliz pe ek sham' jala kar dekhen

wo samajhta hai ye andaz-e-taKHatub ki nahin

ye ghazal us ghazal-ara ko suna kar dekhen