wo subh wasl kar ke pareshan bhi gaya

vo sub.h vasl kar ke pareshān bhī gayā

lekin ridā-e-vā'da-e-shab taan bhī gayā

ik baar maiñ sifārish-e-ashk-o-du'ā ke baa'd

us anjuman meñ be-sar-o-sāmān bhī gayā

ruḳhsat huā hai dil se tumhārā ḳhayāl bhī

is ghar se aaj āḳhirī mehmān bhī gayā

aisā kahāñ vo mānñe vaalā thā merī baat

bādal umaD ke aa.e haiñ to maan bhī gayā

bahkā rahā hai kaun mujhe yuuñ tire ḳhilāf

ik martaba ḳhud apnī taraf dhyān bhī gayā

kyā kar sakegā shahr ki marne se peshtar

gar apne qātiloñ ko maiñ pahchān bhī gayā

dushman ke dil meñ ab bhī hai dahshat mirī 'jamāl'

har chand mere haath se maidān bhī gayā

wo subh wasl kar ke pareshan bhi gaya

lekin rida-e-wa'da-e-shab tan bhi gaya

ek bar main sifarish-e-ashk-o-du'a ke ba'd

us anjuman mein be-sar-o-saman bhi gaya

ruKHsat hua hai dil se tumhaara KHayal bhi

is ghar se aaj aaKHiri mehman bhi gaya

aisa kahan wo manne wala tha meri baat

baadal umaD ke aae hain to man bhi gaya

bahka raha hai kaun mujhe yun tere KHilaf

ek martaba KHud apni taraf dhyan bhi gaya

kya kar sakega shahr ki marne se peshtar

gar apne qatilon ko main pahchan bhi gaya

dushman ke dil mein ab bhi hai dahshat meri 'jamal'

har chand mere hath se maidan bhi gaya