wo tafawuten hain mere KHuda ki ye tu nahin koi aur hai

vo tafāvuteñ haiñ mire ḳhudā ki ye tū nahīñ koī aur hai

ki tū āsmān pe ho to ho ye sar-e-zamīñ koī aur hai

vo jo rāste the vafā ke the ye jo manzileñ haiñ sazā kī haiñ

mirā ham-safar koī aur thā mirā ham-nashīñ koī aur hai

mire jism-o-jāñ meñ tire sivā nahīñ aur koī bhī dūsrā

mujhe phir bhī lagtā hai is tarah ki kahīñ kahīñ koī aur hai

maiñ asiir apne ġhazāl kā maiñ faqīr dasht-e-visāl kā

jo hiran ko bāñdh ke le gayā vo subuktagīñ koī aur hai

maiñ 'ajab musāfir-e-be-amāñ ki jahāñ jahāñ bhī gayā vahāñ

mujhe ye lagā mirā ḳhāk-dāñ ye zamīñ nahīñ koī aur hai

rahe be-ḳhabar mire yaar tak kabhī is pe shak kabhī us pe shak

mire jī ko jis kī rahī lalak vo qamar-jabīñ koī aur hai

ye jo chaar din ke nadīm haiñ inheñ kyā 'farāz' koī kahe

vo mohabbateñ vo shikāyateñ hameñ jis se thiiñ koī aur hai

wo tafawuten hain mere KHuda ki ye tu nahin koi aur hai

ki tu aasman pe ho to ho ye sar-e-zamin koi aur hai

wo jo raste the wafa ke the ye jo manzilen hain saza ki hain

mera ham-safar koi aur tha mera ham-nashin koi aur hai

mere jism-o-jaan mein tere siwa nahin aur koi bhi dusra

mujhe phir bhi lagta hai is tarah ki kahin kahin koi aur hai

main asir apne ghazal ka main faqir dasht-e-visal ka

jo hiran ko bandh ke le gaya wo subuktagin koi aur hai

main 'ajab musafir-e-be-aman ki jahan jahan bhi gaya wahan

mujhe ye laga mera KHak-dan ye zamin nahin koi aur hai

rahe be-KHabar mere yar tak kabhi is pe shak kabhi us pe shak

mere ji ko jis ki rahi lalak wo qamar-jabin koi aur hai

ye jo chaar din ke nadim hain inhen kya 'faraaz' koi kahe

wo mohabbaten wo shikayaten hamein jis se thin koi aur hai