ye dhup chand sitare hawa ghaTa barish

ye dhuup chāñd sitāre havā ghaTā bārish

zuhūr-e-haq kī dalīleñ haiñ jā-ba-jā bārish

'ajab latīf sā manzar hai mere ḳhvāboñ kā

ki terī yaad hai maiñ huuñ zarā zarā bārish

siyāh faam ke dhānoñ kī ḳhushk fasloñ par

‘araq sabāhat-e-tal’at kā ho 'atā bārish

ye kisht-e-kaif mirī jis se lahlahā uTThe

pata us abr-e-guhar-bār kā batā bārish

tū ek os kā qatra maiñ sar-basar pyāsā

mirī ye tishna-labī dekh jā ke lā bārish

har ek shai ko barābar ho is se sairābī

tū apne mazraf-e-hastī ko yuuñ banā bārish

hamārī fard-e-ḳhatā ke nuqūsh dhul jaa.eñ

agar vo bhej de baḳhshish kī be-bahā bārish

ye soch kar hī maiñ andar se bhiig jaatā huuñ

ki le ke Duub na jaa.e makāñ mirā bārish

ye dhup chand sitare hawa ghaTa barish

zuhur-e-haq ki dalilen hain ja-ba-ja barish

'ajab latif sa manzar hai mere KHwabon ka

ki teri yaad hai main hun zara zara barish

siyah fam ke dhanon ki KHushk faslon par

‘araq sabahat-e-tal’at ka ho 'ata barish

ye kisht-e-kaif meri jis se lahlaha uTThe

pata us abr-e-guhar-bar ka bata barish

tu ek os ka qatra main sar-basar pyasa

meri ye tishna-labi dekh ja ke la barish

har ek shai ko barabar ho is se sairabi

tu apne mazraf-e-hasti ko yun bana barish

hamari fard-e-KHata ke nuqush dhul jaen

agar wo bhej de baKHshish ki be-baha barish

ye soch kar hi main andar se bhig jata hun

ki le ke Dub na jae makan mera barish