ye kis qayamat ki bekasi hai zamin hi apna na yar mera

ye kis qayāmat kī bekasī hai zamīñ hī apnā na yaar merā

na ḳhātir-e-be-qarār merī na dīda-e-ashk-bār merā

nishān-e-turbat ayaañ nahīñ hai nahīñ ki baaqī nishāñ nahīñ hai

mazār merā kahāñ nahīñ hai kahīñ nahīñ hai mazār merā

visāl terā ḳhayāl terā jo ho to kyūñkar na ho to kyūñkar

na tujh pe kuchh iḳhtiyār dil kā na dil pe kuchh iḳhtiyār merā

nigāh-e-dil-doz kī duhā.ī jamāl-e-jāñ-soz kī duhā.ī

rah-e-mohabbat meñ ġham ne luuTā shakeb o sabr o qarār merā

maiñ dard-e-furqat se jāñ-ba-lab huuñ tumheñ yaqīn-e-vafā nahīñ hai

mujhe nahīñ e'tibār apnā tumheñ nahīñ e'tibār merā

qadam nikāl ab to ghar se bāhar jo dam bhī siine se sahl nikle

dikhā na ab intizār apnā lahad ko hai intizār merā

sunā hai uTThā hai ik bagūla jilau meñ kuchh āñdhiyoñ ko le kar

tavāf-e-dast-e-junūñ ko shāyad gayā hai 'fānī' ġhubār merā

ye kis qayamat ki bekasi hai zamin hi apna na yar mera

na KHatir-e-be-qarar meri na dida-e-ashk-bar mera

nishan-e-turbat ayan nahin hai nahin ki baqi nishan nahin hai

mazar mera kahan nahin hai kahin nahin hai mazar mera

visal tera KHayal tera jo ho to kyunkar na ho to kyunkar

na tujh pe kuchh iKHtiyar dil ka na dil pe kuchh iKHtiyar mera

nigah-e-dil-doz ki duhai jamal-e-jaan-soz ki duhai

rah-e-mohabbat mein gham ne luTa shakeb o sabr o qarar mera

main dard-e-furqat se jaan-ba-lab hun tumhein yaqin-e-wafa nahin hai

mujhe nahin e'tibar apna tumhein nahin e'tibar mera

qadam nikal ab to ghar se bahar jo dam bhi sine se sahl nikle

dikha na ab intizar apna lahad ko hai intizar mera

suna hai uTTha hai ek bagula jilau mein kuchh aandhiyon ko le kar

tawaf-e-dast-e-junun ko shayad gaya hai 'fani' ghubar mera