ye wahime bhi ajab baam-o-dar banate hain

ye vāhime bhī ajab bām-o-dar banāte haiñ

havā kī shāḳh pe ḳhushbū kā ghar banāte haiñ

kaf-e-ḳhayāl pe aks-e-nashāt-e-rañg tirā

nahīñ banāne kā yaarā magar banāte haiñ

ye mashġhala hai tire āshiyāñ parastoñ kā

ki zer-e-dām paḌe bāl-o-par banāte haiñ

vo apnī marzī kā matlab nikāl letā hai

agarche baat to ham soch kar banāte haiñ

maiñ jab bhī dhuup ke sahrā meñ jā nikaltā huuñ

vo haath mujh pe duā kā shajar banāte haiñ

mirī misāl hai un sabz shāḳhchoñ jaisī

jo dhuup kaat ke malbūs zar banāte haiñ

ham us ko bhuul ke karte haiñ shā.irī 'tābish'

kamāl-e-be-hunarī se hunar banāte haiñ

ye wahime bhi ajab baam-o-dar banate hain

hawa ki shaKH pe KHushbu ka ghar banate hain

kaf-e-KHayal pe aks-e-nashat-e-rang tera

nahin banane ka yara magar banate hain

ye mashghala hai tere aashiyan paraston ka

ki zer-e-dam paDe baal-o-par banate hain

wo apni marzi ka matlab nikal leta hai

agarche baat to hum soch kar banate hain

main jab bhi dhup ke sahra mein ja nikalta hun

wo hath mujh pe dua ka shajar banate hain

meri misal hai un sabz shaKHchon jaisi

jo dhup kat ke malbus zar banate hain

hum us ko bhul ke karte hain shairi 'tabish'

kamal-e-be-hunari se hunar banate hain