یوں تو پہنے ہوئے پیراہن خار آتا ہوں

یوں تو پہنے ہوئے پیراہن خار آتا ہوں

یہ بھی دیکھو کہ بسودائے بہار آتا ہوں

عرش سے جب نہیں اٹھتی مری فریاد کی گونج

میں تجھے دل کے خرابے میں پکار آتا ہوں

مجھے آتا ہی نہیں بس میں کسی کے آنا

آؤں بھی تو بکف آبلہ دار آتا ہوں

تو یہاں زیر افق چند گھڑی سستا لے

میں ذرا دن سے نمٹ کر شب تار! آتا ہوں

تجھ سے چھٹ کر بھی تری سرخیٔ عارض کی قسم

چپکے چپکے ترے دل میں کئی بار آتا ہوں

یہ الگ بات کہ پھولوں پہ ہو زخموں کا گماں

میں تو جب آتا ہوں ہمرنگ بہار آتا ہوں

دشت ہر فکر سے میں عصر رواں کا انساں

ہو کے خود اپنی ذہانت کا شکار آتا ہوں

انہی دو باتوں میں کٹ جاتی ہے سب عمر ندیمؔ

اے غم دہر نہ چھیڑ اے غم یار آتا ہوں