zamin sahra ki ek ik bund ki KHatir tarasti hai

zamīñ sahrā kī ik ik buuñd kī ḳhātir tarastī hai

tū ai barsāt kyoñ jā kar samandar par barastī hai

na ūñchā āsmāñ terā na nīchī hai zamīñ merī

faqat ik fāsla hai bas bulandī hai na pastī hai

hameñ ai shaiḳh har but meñ ḳhudā kā nuur dikhtā hai

hamārī but-parastī dar-haqīqat haq-parastī hai

yahāñ har ik qadam par maut kā sāmān bikhrā hai

darindo mat yahāñ aanā ye insānoñ kī bastī hai

khule jo rāz-e-hastī to na jaane kyā ho hangāma

hai hastī tab talak jab tak nihāñ ye rāz-e-hastī hai

amīrī kā ho aalam ai 'sadā' yā tang-dastī kā

razā meñ us kī rahnā siikh phir mastī hī mastī hai

zamin sahra ki ek ek bund ki KHatir tarasti hai

tu ai barsat kyon ja kar samandar par barasti hai

na uncha aasman tera na nichi hai zamin meri

faqat ek fasla hai bas bulandi hai na pasti hai

hamein ai shaiKH har but mein KHuda ka nur dikhta hai

hamari but-parasti dar-haqiqat haq-parasti hai

yahan har ek qadam par maut ka saman bikhra hai

darindo mat yahan aana ye insanon ki basti hai

khule jo raaz-e-hasti to na jaane kya ho hangama

hai hasti tab talak jab tak nihan ye raaz-e-hasti hai

amiri ka ho aalam ai 'sada' ya tang-dasti ka

raza mein us ki rahna sikh phir masti hi masti hai