ذہن میں بیتے ہوئے لمحوں کا خمیازہ نہ تھا

ذہن میں بیتے ہوئے لمحوں کا خمیازہ نہ تھا

ڈوبنے سے قبل گہرائی کا اندازہ نہ تھا

چور گھس آئے تو ننگی چوکھٹوں کے دن پھرے

اس سے پہلے میرے گھر میں کوئی دروازہ نہ تھا

لمحہ لمحہ زندگی نے خرچ کر ڈالا ہمیں

وقت جب آیا بکھرنے کا تو شیرازہ نہ تھا

ڈھونڈ کر مرہم بھی ہم لائے تو ایسے وقت میں

زخم سارے بھر چکے تھے ایک بھی تازہ نہ تھا

شکر کر میرے جنوں کا ورنہ اے عہد غزل

خون دل میرا ترے رخسار کا غازہ نہ تھا