aage to rasm dosti ki thi jahan ke bich

aage to rasm dostī kī thī jahāñ ke biich

ab kaise log aa.e zamīñ āsmāñ ke biich

maiñ be-dimāġh-e-ishq uThā so chalā gayā

bulbul pukārtī hī rahī gulsitāñ ke biich

tahrīk chalne kī hai jo dekho nigāh kar

hai.at ko apnī maujoñ meñ āb-e-ravāñ ke biich

kyā mail ho humā kī pas-az-marg merī or

hai jā-e-gīr ishq kī tab ustuḳhvāñ ke biich

kyā jānūñ log kahte haiñ kis ko surūr-e-qalb

aaya nahīñ ye lafz to hindī zabāñ ke biich

tāle.a se ban ga.ī ki ham us mah kane ga.e

bigḌī thī raat us ke sag-o-pāsbāñ ke biich

itnī jabīn ragḌī ki sang aa.ina huā

aane lagā hai muñh nazar us āstāñ ke biich

ḳhūgar hue haiñ ishq kī garmī se ḳhār-o-ḳhas

bijlī paḌī rahī hai mire āshiyāñ ke biich

is rū-e-bar-froḳhta se jī Dare hai 'mīr'

ye aag jā lagegī kisū dūdmāñ ke biich

aage to rasm dosti ki thi jahan ke bich

ab kaise log aae zamin aasman ke bich

main be-dimagh-e-ishq uTha so chala gaya

bulbul pukarti hi rahi gulsitan ke bich

tahrik chalne ki hai jo dekho nigah kar

haiat ko apni maujon mein aab-e-rawan ke bich

kya mail ho huma ki pas-az-marg meri or

hai ja-e-gir ishq ki tab ustuKHwan ke bich

kya jaanun log kahte hain kis ko surur-e-qalb

aaya nahin ye lafz to hindi zaban ke bich

talea se ban gai ki hum us mah kane gae

bigDi thi raat us ke sag-o-pasban ke bich

itni jabin ragDi ki sang aaina hua

aane laga hai munh nazar us aastan ke bich

KHugar hue hain ishq ki garmi se KHar-o-KHas

bijli paDi rahi hai mere aashiyan ke bich

is ru-e-bar-froKHta se ji Dare hai 'mir'

ye aag ja lagegi kisu dudman ke bich