ab hum faqir ji se dil ko uTha ke baiThe

ab ham faqīr jī se dil ko uThā ke baiThe

us ḳhasm-e-jāñ ke dar par takiya banā ke baiThe

marte hue bhī ham ko sūrat na aa dikhā.ī

vaqt-e-aḳhīr achchhā muñh ko chhupā ke baiThe

uzlat-nashīñ hue jab dil daaġh ho gayā tab

ya.anī ki āshiqī meñ ham ghar jalā ke baiThe

jo kufr jānte the ishq-e-butāñ ko vo hī

masjid ke aage āḳhir qashqa lagā ke baiThe

shor-e-matā.a-e-ḳhūbī us shoḳh kā balā thā

bāzārī sab dukāneñ apnī baḌhā ke baiThe

kyā apnī aur us kī ab naql kariye sohbat

majlis se uTh gayā vo Tuk ham jo aa ke baiThe

kyā jaane teġh us kī kab ho buland āshiq

yuuñ chāhiye ki sar ko har dam jhukā ke baiThe

qit.a

phūloñ kī sej par se jo be-dimāġh uTThe

masnad pe naaz kī jo tyorī chaḌhā ke baiThe

kyā ġham use zamīñ par be-barg-o-sāz koī

ḳhār-o-ḳhasak hī kyoñ na barsoñ bichhā ke baiThe

vādī-e-qais se phir aa.e na 'mīr' sāhib

murshid ke Dher par ve shāyad ki jā ke baiThe

ab hum faqir ji se dil ko uTha ke baiThe

us KHasm-e-jaan ke dar par takiya bana ke baiThe

marte hue bhi hum ko surat na aa dikhai

waqt-e-aKHir achchha munh ko chhupa ke baiThe

uzlat-nashin hue jab dil dagh ho gaya tab

yani ki aashiqi mein hum ghar jala ke baiThe

jo kufr jaante the ishq-e-butan ko wo hi

masjid ke aage aaKHir qashqa laga ke baiThe

shor-e-mataa-e-KHubi us shoKH ka bala tha

bazari sab dukanen apni baDha ke baiThe

kya apni aur us ki ab naql kariye sohbat

majlis se uTh gaya wo Tuk hum jo aa ke baiThe

kya jaane tegh us ki kab ho buland aashiq

yun chahiye ki sar ko har dam jhuka ke baiThe

qita

phulon ki sej par se jo be-dimagh uTThe

masnad pe naz ki jo tyori chaDha ke baiThe

kya gham use zamin par be-barg-o-saz koi

KHar-o-KHasak hi kyon na barson bichha ke baiThe

wadi-e-qais se phir aae na 'mir' sahib

murshid ke Dher par we shayad ki ja ke baiThe