اب کے ہزار رنگ گلستاں میں آئے گل

اب کے ہزار رنگ گلستاں میں آئے گل

پر اس بغیر اپنے تو جی کو نہ بھائے گل

بلبل کو ناز کیوں نہ خیابان گل پہ ہو

کیا جانے جن نے چھاتی پہ بھر کر نہ کھائے گل

کب تک حنائی پاؤں بن اس کے یہ بیکلی

لگ جائے ٹک چمن میں کہیں آنکھ پاے گل

ناچار ہو چمن میں نہ رہیے کہوں ہوں جب

بلبل کہے ہے اور کوئی دن براے گل

چلئے بغل میں لے کے گلابی کسو طرف

دامان دل کو کھینچے ہے ساقی ہواے گل

پگڑی میں پھول رکھتے ہیں رعنا جوان شہر

داغ جنوں ہی سر پہ رہا یاں بجاے گل

بلبل کو کیا سنے کوئی اڑ جاتے ہیں حواس

جب دردمند کہتی ہے دم بھر کے ہائے گل

سویا نہ وہ بدن کی نزاکت سے ساری رات

بستر پہ اس کے خواب کے کن نے بچھائے گل

مصروف یار چاہیے مرغ چمن سا ہو

دل نذر و دیدہ پیش کش و جاں فدائے گل

ہم طرح آشیاں کی نہ گلشن میں ڈالتے

معلوم ہوتی آگے جو ہم کو وفائے گل

چسپاں لباس ہوتے ہیں لیکن نہ اس قدر

ہے چاک رشک جامہ سے اس کے قبائے گل

کیا سمجھے لطف چہروں کے رنگ و بہار کا

بلبل نے اور کچھ نہیں دیکھا سوائے گل

تھا وصف ان لبوں کا زبان قلم پہ میرؔ

یا منہ میں عندلیب کے تھے برگ ہائے گل