bil-quwwa Tuk dikhaiye chashm-e-pur-ab ka

bil-quvva Tuk dikhā.iye chashm-e-pur-āb kā

dāman pakaḌ ke roiye yak-dam sahāb kā

jo kuchh nazar paḌe hai haqīqat meñ kuchh nahīñ

aalam meñ ḳhuub dekho to aalam hai ḳhvāb kā

dariyā-dilī jinheñ hai nahīñ hote kāsa-lais

dekhā hai vāzhgūñ hī piyāla habāb kā

shāyad ki qalb-e-yār bhī Tuk is taraf phire

maiñ muntazir zamāne ke huuñ inqalāb kā

baare naqāb din ko jo rakhtā hai muñh pe tū

parda sā rah gayā hai kuchh ik āftāb kā

talvār bin nikalte nahīñ ghar se ek dam

ḳhuuñ kar rahoge tum kisū ḳhāna-ḳharāb kā

ye hosh dekh aage mire saath ġhair ke

rakhtā hai paañv mast ho jaise sharāb kā

majnūñ meñ aur mujh meñ kare kyoñ na farq ishq

chhuptā nahīñ maza to jale se kabāb kā

ro fursat-e-javānī pe juuñ abr be-ḳhabar

andāz barq kā sā hai ahd-e-shabāb kā

vaañ se to nāma-bar ko hai kab kā javāb saaf

maiñ sādgī se laagū huuñ ḳhat ke javāb kā

Tapkā kare hai zahr hī sirf us nigāh se

vo chashm ghar hai ġhussa-o-nāz-o-itāb kā

laa.eq thā rījhne hī ke misrā’-e-qadd-e-yār

maiñ mo'taqid huuñ 'mīr' tire intiḳhāb kā

bil-quwwa Tuk dikhaiye chashm-e-pur-ab ka

daman pakaD ke roiye yak-dam sahab ka

jo kuchh nazar paDe hai haqiqat mein kuchh nahin

aalam mein KHub dekho to aalam hai KHwab ka

dariya-dili jinhen hai nahin hote kasa-lais

dekha hai wazhgun hi piyala habab ka

shayad ki qalb-e-yar bhi Tuk is taraf phire

main muntazir zamane ke hun inqalab ka

bare naqab din ko jo rakhta hai munh pe tu

parda sa rah gaya hai kuchh ek aaftab ka

talwar bin nikalte nahin ghar se ek dam

KHun kar rahoge tum kisu KHana-KHarab ka

ye hosh dekh aage mere sath ghair ke

rakhta hai panw mast ho jaise sharab ka

majnun mein aur mujh mein kare kyon na farq ishq

chhupta nahin maza to jale se kabab ka

ro fursat-e-jawani pe jun abr be-KHabar

andaz barq ka sa hai ahd-e-shabab ka

wan se to nama-bar ko hai kab ka jawab saf

main sadgi se lagu hun KHat ke jawab ka

Tapka kare hai zahr hi sirf us nigah se

wo chashm ghar hai ghussa-o-naz-o-itab ka

laeq tha rijhne hi ke misra’-e-qadd-e-yar

main mo'taqid hun 'mir' tere intiKHab ka