ji ke tain chhupate nahin yun to gham se hum

jī ke ta.iiñ chhupāte nahīñ yuuñ to ġham se ham

par tang aa ga.e haiñ tumhāre sitam se ham

apne ḳhayāl hī meñ guzartī hai apnī 'umr

par kuchh na pūchho samjhe nahīñ jaate ham se ham

zaanū pe sar hai qāmat-e-ḳham-gashta ke sabab

piirī meñ apnī aan lage haiñ qadam se ham

juuñ chakma mīr-e-hāj kā hai ḳhvār-e-jā-namāz

but-ḳhāne meñ jo aa.e haiñ chal kar haram se ham

rote bhī un ne dekh ke ham ko kiyā na rahm

ik chashm-dāsht rakhte the mizhgān-e-nam se ham

bad-'ahdiyāñ hī karte ga.e us ko sāl-o-māh

ab kab tasallī hote haiñ qaul-o-qasam se ham

zunnār sā bañdhā hai gale apne ab to kufr

badnām haiñ jahān meñ ‘ishq-e-sanam se ham

logoñ ke vasf karne se bālīdgī huī

juuñ shīsha phail phuuT paḌe un ke dam se ham

tarfeñ rakhe hai ek suḳhan chaar chaar 'mīr'

kyā kyā kahā kareñ haiñ zabān-e-qalam se ham

ji ke tain chhupate nahin yun to gham se hum

par tang aa gae hain tumhaare sitam se hum

apne KHayal hi mein guzarti hai apni 'umr

par kuchh na puchho samjhe nahin jate hum se hum

zanu pe sar hai qamat-e-KHam-gashta ke sabab

piri mein apni aan lage hain qadam se hum

jun chakma mir-e-haj ka hai KHwar-e-ja-namaz

but-KHane mein jo aae hain chal kar haram se hum

rote bhi un ne dekh ke hum ko kiya na rahm

ek chashm-dasht rakhte the mizhgan-e-nam se hum

bad-'ahdiyan hi karte gae us ko sal-o-mah

ab kab tasalli hote hain qaul-o-qasam se hum

zunnar sa bandha hai gale apne ab to kufr

badnam hain jahan mein ‘ishq-e-sanam se hum

logon ke wasf karne se baalidgi hui

jun shisha phail phuT paDe un ke dam se hum

tarfen rakhe hai ek suKHan chaar chaar 'mir'

kya kya kaha karen hain zaban-e-qalam se hum