جی کے تئیں چھپاتے نہیں یوں تو غم سے ہم

جی کے تئیں چھپاتے نہیں یوں تو غم سے ہم

پر تنگ آ گئے ہیں تمھارے ستم سے ہم

اپنے خیال ہی میں گزرتی ہے اپنی عمر

پر کچھ نہ پوچھو سمجھے نہیں جاتے ہم سے ہم

زانو پہ سر ہے قامت خم گشتہ کے سبب

پیری میں اپنی آن لگے ہیں قدم سے ہم

جوں چکمہ میر حاج کا ہے خوار جانماز

بت خانے میں جو آئے ہیں چل کر حرم سے ہم

روتے بھی ان نے دیکھ کے ہم کو کیا نہ رحم

اک چشم داشت رکھتے تھے مژگان نم سے ہم

بد عہدیاں ہی کرتے گئے اس کو سال و ماہ

اب کب تسلی ہوتے ہیں قول و قسم سے ہم

زنار سا بندھا ہے گلے اپنے اب تو کفر

بدنام ہیں جہان میں عشق صنم سے ہم

لوگوں کے وصف کرنے سے بالیدگی ہوئی

جوں شیشہ پھیل پھوٹ پڑے ان کے دم سے ہم

طرفیں رکھے ہے ایک سخن چار چار میرؔ

کیا کیا کہا کریں ہیں زبان قلم سے ہم