tegh ki naubat kab pahunche hai apne ji ki ghaarat mein

teġh kī naubat kab pahuñche hai apne jī kī ġhārat meñ

'āshiq-e-zār ko maar rakhe hai ek abrū kī ishārat meñ

guzariye gar dil meñ ho kar to ek nigāh zarūrī hai

kuchh kuchh tere ġham ne likhā hai aa kar vaañ kī 'imārat meñ

suukh ke maiñ to 'ishq ke ġham meñ ḳhas kī misāl haqīr huā

vo taqsīr nahīñ kartā hai ab tak merī hiqārat meñ

ek bagūlā saath mujhe bhī turbat-e-qais pe le aayā

kitne ġhazāl nazar vaañ aa.e the mashġhūl ziyārat meñ

dil ko aag ik dam meñ de dī ashk hue chingārī se

kyā hī sharīr hai shoḳhī-e-barq milā.ī un ne sharārat meñ

shaiḳh jo thā dīdār-e-butāñ kā munkir aisā thā mā'zūr

dil ko basīrat thī nā us ke be-nūrī thī basārat meñ

ḳhatt-o-kitābat ek taraf hai daftar likh likh bheje 'mīr'

kahiye kuchh jo sarīr-e-qalam kī kotāhī ho sifārat meñ

tegh ki naubat kab pahunche hai apne ji ki ghaarat mein

'ashiq-e-zar ko mar rakhe hai ek abru ki ishaarat mein

guzariye gar dil mein ho kar to ek nigah zaruri hai

kuchh kuchh tere gham ne likha hai aa kar wan ki 'imarat mein

sukh ke main to 'ishq ke gham mein KHas ki misal haqir hua

wo taqsir nahin karta hai ab tak meri hiqarat mein

ek bagula sath mujhe bhi turbat-e-qais pe le aaya

kitne ghazal nazar wan aae the mashghul ziyarat mein

dil ko aag ek dam mein de di ashk hue chingari se

kya hi sharir hai shoKHi-e-barq milai un ne shararat mein

shaiKH jo tha didar-e-butan ka munkir aisa tha ma'zur

dil ko basirat thi na us ke be-nuri thi basarat mein

KHatt-o-kitabat ek taraf hai daftar likh likh bheje 'mir'

kahiye kuchh jo sarir-e-qalam ki kotahi ho sifarat mein