ayaz chup hai

ayaaz chup hai

sadā-e-mahmūd harb-e-tāza kī tez-tar rau meñ

bah ga.ī hai

ayaaz chup hai

ayaaz chup hai ki ab asīrān-e-shab bhī

ḳhvābīda aks le kar

thakī thakī ḳhvāhishoñ ke sīnoñ pe so ga.e haiñ

vo din ki jis din

jale hue tāqchoñ pe harfoñ kī be-kafan laash

dafn hogī

vo din calender kī sabz tah se sarak gayā hai

ayaaz chup hai

luTī huī bastiyoñ meñ tārīḳh kā paḌāv

safoñ meñ tartīb DhūñDhtā hai

lahū kī hiddat meñ munqasim sub.h kam-nasībāñ kā garm sūraj

hazār-hā girheñ kholtā hai

to shahr-e-kohsār ke jilau meñ qadīm shāhrāh pūchhtī hai

ayaaz chup hai ki boltā hai

ayaaz chup hai

sadā-e-mahmūd harb-e-tāza kī tez-tar rau meñ bah ga.ī hai

ayaz chup hai

sada-e-mahmud harb-e-taza ki tez-tar rau mein

bah gai hai

ayaz chup hai

ayaz chup hai ki ab asiran-e-shab bhi

KHwabida aks le kar

thaki thaki KHwahishon ke sinon pe so gae hain

wo din ki jis din

jale hue taqchon pe harfon ki be-kafan lash

dafn hogi

wo din calender ki sabz tah se sarak gaya hai

ayaz chup hai

luTi hui bastiyon mein tariKH ka paDaw

safon mein tartib DhunDhta hai

lahu ki hiddat mein munqasim subh kam-nasiban ka garm suraj

hazar-ha girhen kholta hai

to shahr-e-kohsar ke jilau mein qadim shahrah puchhti hai

ayaz chup hai ki bolta hai

ayaz chup hai

sada-e-mahmud harb-e-taza ki tez-tar rau mein bah gai hai