banduq mujhe wo nain hona

bāzār se abbū aa.e haiñ

kuchh na.e khilaune laa.e haiñ

hisse meñ mire jo aayā hai

dil ko na mire vo bhāyā hai

is chiiz se kaise bahal pā.ūñ

is naam se kyoñ na dahal jā.ūñ

dushvār jo kar jaa.e jiinā

mazlūm kā chīre jo siina

bhaa.ī ko kare bhaa.ī se judā

bahnoñ kī kare na jo parvā

jo qadr kare na bachchoñ kī

muskān jo chhīne hoñToñ kī

jo dhuup kare hai chhāoñ kī

godī jo ujāḌe maaoñ kī

jo ḳhuun kī khele hai holī

siine pe chalā.e jo golī

insāñ ke lahū kī pyāsī ho

zālim kī sadā jo daasī ho

sāmān jo ho barbādī kā

hathiyār ho ātañkvādī kā

bandūq mujhe vo na.iiñ honā

koī aur khilaunā lā denā

bazar se abbu aae hain

kuchh nae khilaune lae hain

hisse mein mere jo aaya hai

dil ko na mere wo bhaya hai

is chiz se kaise bahal paun

is nam se kyon na dahal jaun

dushwar jo kar jae jina

mazlum ka chire jo sina

bhai ko kare bhai se juda

bahnon ki kare na jo parwa

jo qadr kare na bachchon ki

muskan jo chhine honTon ki

jo dhup kare hai chhaon ki

godi jo ujaDe maon ki

jo KHun ki khele hai holi

sine pe chalae jo goli

insan ke lahu ki pyasi ho

zalim ki sada jo dasi ho

saman jo ho barbaadi ka

hathiyar ho aatankwadi ka

banduq mujhe wo nain hona

koi aur khilauna la dena