chhoTi si bachchi

maiñ nazm likhtā huuñ

chhoTī sī bachchī mujhe dekhtī hai

aur mere paas baiTh jaatī hai

maiñ likhtā rahtā huuñ

vo takiye par apne bāloñ bhare bandar ko sulāne lagtī hai

vo apne chhoTe se hāthī ko

hāthoñ meñ le kar us se bāteñ kartī haiñ

bāhar se firing kī āvāz aatī hai

maiñ us se pūchhtā huuñ

Dar to nahīñ lag rahā?

nahīñ vo bahut āsānī se javāb detī hai

aur apnā hāthī mujhe de detī hai

jahāñ shīshe ke do chamakdār baizavī TukḌoñ meñ

chhoTī sī bachchī kā aks

hamesha jhilmilātā rahtā hai

maiñ nazm likhtā rahtā huuñ

khelte khelte achānak

vo mujh se pūchhtī hai

'zīshān', kyā tumheñ bhī

bahut saarā home-work milā hai?

haañ, bahut saarā

maiñ kahtā huuñ

aur us ke hāthī se khelne lagtā huuñ

main nazm likhta hun

chhoTi si bachchi mujhe dekhti hai

aur mere pas baiTh jati hai

main likhta rahta hun

wo takiye par apne baalon bhare bandar ko sulane lagti hai

wo apne chhoTe se hathi ko

hathon mein le kar us se baaten karti hain

bahar se firing ki aawaz aati hai

main us se puchhta hun

Dar to nahin lag raha?

nahin wo bahut aasani se jawab deti hai

aur apna hathi mujhe de deti hai

jahan shishe ke do chamakdar baizawi TukDon mein

chhoTi si bachchi ka aks

hamesha jhilmilata rahta hai

main nazm likhta rahta hun

khelte khelte achanak

wo mujh se puchhti hai

'zishan', kya tumhein bhi

bahut sara home-work mila hai?

han, bahut sara

main kahta hun

aur us ke hathi se khelne lagta hun