chizen apni jagah tabdil karna chahti hain

us lafz kā

kyā matlab hai jo

tum mohabbat meñ shukr-gizārī ke liye

ek ḳhāse mauqe par

istimāl kartī ho

kisī aur jagah

kisī aur shaḳhs ke sāmne

jazbāt ke shiddat se iz.hār ke liye

kyā isī tarah is lafz ko

dohrāyā jā saktā hai?

kyā ise kahte hue

lafzoñ kī sāḳht

aur durust adā.egī kā

hamesha ḳhayāl rakhnā hogā?

kyā merī thoḌī sī

be-ehtiyātī us kā mafhūm

bahut ziyāda tabdīl to nahīñ kar degī

kyā is lafz ke liye

kisī dūsrī zabān meñ

koī mutabādil lafz

ziyāda madad-gār sābit nahīñ hogā?

aur sab bātoñ ke bāvajūd

maiñ jo kuchh chāhtā huuñ

shāyad vāzeh na ho sake

is lafz ke liye

jo tum kahtī ho ek ḳhaas mauqe par

mohabbat meñ shukr-guzārī ke taur par

jab hamesha kī tarah

chīzeñ apnī jagah tabdīl karnā chāhtī haiñ

us lafz ka

kya matlab hai jo

tum mohabbat mein shukr-gizari ke liye

ek KHase mauqe par

istimal karti ho

kisi aur jagah

kisi aur shaKHs ke samne

jazbaat ke shiddat se izhaar ke liye

kya isi tarah is lafz ko

dohraya ja sakta hai?

kya ise kahte hue

lafzon ki saKHt

aur durust adaegi ka

hamesha KHayal rakhna hoga?

kya meri thoDi si

be-ehtiyati us ka mafhum

bahut ziyaada tabdil to nahin kar degi

kya is lafz ke liye

kisi dusri zaban mein

koi mutabaadil lafz

ziyaada madad-gar sabit nahin hoga?

aur sab baaton ke bawajud

main jo kuchh chahta hun

shayad wazeh na ho sake

is lafz ke liye

jo tum kahti ho ek KHas mauqe par

mohabbat mein shukr-guzari ke taur par

jab hamesha ki tarah

chizen apni jagah tabdil karna chahti hain