gum-shudagan

kanār-e-shām kisī bū-e-gum-shuda kā surāġh

milā to ham bhī sar-e-rahguzār chalne lage

kisī darīche ke andar charāġh jalne lage

kisī ufuq pe chamaktā huā koī mahtāb

kisī nazar se utartā huā koī chehra

kisī shabāb meñ jhalkā huā malāl kā rang

isī havā meñ chale aa.e rahguzār pe ham

mahak talāshte phirte the

koī anhonī

hamī ko āḳhir-e-shab meñ shikār kar legī

talāsh karte hue bū-e-gum-shuda kā badan

ham apnā aap bhī kho deñge rahguzāroñ meñ

magar chamak nahīñ pā.eñge ham sitāroñ meñ

kanar-e-sham kisi bu-e-gum-shuda ka suragh

mila to hum bhi sar-e-rahguzar chalne lage

kisi dariche ke andar charagh jalne lage

kisi ufuq pe chamakta hua koi mahtab

kisi nazar se utarta hua koi chehra

kisi shabab mein jhalka hua malal ka rang

isi hawa mein chale aae rahguzar pe hum

mahak talashte phirte the

koi anhoni

hami ko aaKHir-e-shab mein shikar kar legi

talash karte hue bu-e-gum-shuda ka badan

hum apna aap bhi kho denge rahguzaron mein

magar chamak nahin paenge hum sitaron mein