ہم زمیں زاد

ہمارے پیروں کے چھالے پھوٹیں

تو ان کے نم سے

غبار رستوں کا بیٹھتا ہے

ہمارے خوابوں کا خون پی کر یہ سبز رنگی رتیں جواں ہیں

ہمارے سر کاٹ کر اساس فلک میں جب تک دھرے نہ جائیں

کھڑا نہ رہ پائے ایک پل بھی

ہماری پوروں نے قطرہ قطرہ لہو دیا ہے

تو ورق جاں سرخ گوں ہوا ہے

ہمارے اشکوں نے ہر لب دشت کو چھوا ہے

تو تر ہوا ہے

ہمی ہیں وجہ جمال ہستی

ہمارے ہونے سے ارتقا ہے

وگرنہ اس کار گاہ میں کچھ

کمال کن فیکون کیا ہے