kya hai

gayā ho jail na jab tak vo kyā jaane sazā kyā hai

rihā.ī meñ hai kyā diqqat asīrī meñ mazā kyā hai

hamārī shādī ḳhāna-ābādī mohabbat bā-mashaqqat hai

jahāñ biivī mirī jaj ho vahāñ merī razā kyā hai

ye mujh se pūchh baiThī ek din laḌkā numā laḌkī

vafā hai naam kis chiḌiyā kā aur sharm-o-hayā kyā hai

kahā maiñ ne ye us ki ye us aurat ke zevar the

jise mālūm tak na thā ki bāhar keī havā kyā hai

kahā havvā kī beTī ne ki ham āzād panchhī haiñ

ye zevar bojh hote haiñ na pahneñ to burā kyā hai

javāban ye kahā zevar to kyā kapḌe bhī mat pahno

utāro pheñk do ye bojh bhī in meñ rahā kyā hai

milā hai ilm to is se karo kuchh istifāda bhī

kam-az-kam itnā pahchāno ki achchhā kyā burā kyā hai

kabhī jis ne sunī na ho kisī schōl kī ghanTī

use mālūm kyā tārīḳh hai juġhrāfiya kyā hai

koī jānegā kaise 'ḳhvāh-maḳhvāh' ye rāz-e-qudrat hai

azal kī ibtidā kyā thī abad kī intihā kyā hai

gaya ho jail na jab tak wo kya jaane saza kya hai

rihai mein hai kya diqqat asiri mein maza kya hai

hamari shadi KHana-abaadi mohabbat ba-mashaqqat hai

jahan biwi meri jaj ho wahan meri raza kya hai

ye mujh se puchh baiThi ek din laDka numa laDki

wafa hai nam kis chiDiya ka aur sharm-o-haya kya hai

kaha main ne ye us ki ye us aurat ke zewar the

jise malum tak na tha ki bahar kei hawa kya hai

kaha hawwa ki beTi ne ki hum aazad panchhi hain

ye zewar bojh hote hain na pahnen to bura kya hai

jawaban ye kaha zewar to kya kapDe bhi mat pahno

utaro phenk do ye bojh bhi in mein raha kya hai

mila hai ilm to is se karo kuchh istifada bhi

kam-az-kam itna pahchano ki achchha kya bura kya hai

kabhi jis ne suni na ho kisi school ki ghanTi

use malum kya tariKH hai jughrafiya kya hai

koi jaanega kaise 'KHwah-maKHwah' ye raaz-e-qudrat hai

azal ki ibtida kya thi abad ki intiha kya hai