irina

zinda rahne ke liye

mujhe jo ilāqa diyā gayā hai

vahī merā īrīnā hai

maiñ nai is ke chāroñ taraf

ḳhār-dār tāroñ kī baaḌh lagā rakkhī hai

jin meñ har vaqt

currant gardish kartā rahtā hai

aur mere kutte

mere alāva kisī kī ḳhushbū se mānūs nahīñ

maiñ is duniyā ke baare meñ

un sab logoñ se

ziyāda jāntā huuñ

jo hamesha safar karte rahte haiñ

aur kahīñ nahīñ jaatā

mere paas ek album hai

jis meñ chand bādaloñ ke TukḌe

ḳhvāb aur logoñ ke chehre

mahfūz haiñ

yā ek marī huī titlī

jise mere kuttoñ ne

mere qadmoñ meñ lā ke

Daal diyā thā

mere paas ek kashtī hai

jo paanī kī āvāz aur lams se ajnabī hai

aur ek daraḳht

jo havā aur aag ke baare meñ kuchh nahīñ jāntā

mere paas dostoñ ko dene ke liye

bahut se tohfe aur mohabbat bharā dil maujūd hai

aur dushmanoñ ke liye ek talvār

jis kī pyaas kabhī nahīñ bujhtī

zinda rahne ke liye

mujhe jo ilaqa diya gaya hai

wahi mera irina hai

main nai is ke chaaron taraf

KHar-dar taron ki baDh laga rakkhi hai

jin mein har waqt

currant gardish karta rahta hai

aur mere kutte

mere alawa kisi ki KHushbu se manus nahin

main is duniya ke bare mein

un sab logon se

ziyaada jaanta hun

jo hamesha safar karte rahte hain

aur kahin nahin jata

mere pas ek album hai

jis mein chand baadalon ke TukDe

KHwab aur logon ke chehre

mahfuz hain

ya ek mari hui titli

jise mere kutton ne

mere qadmon mein la ke

Dal diya tha

mere pas ek kashti hai

jo pani ki aawaz aur lams se ajnabi hai

aur ek daraKHt

jo hawa aur aag ke bare mein kuchh nahin jaanta

mere pas doston ko dene ke liye

bahut se tohfe aur mohabbat bhara dil maujud hai

aur dushmanon ke liye ek talwar

jis ki pyas kabhi nahin bujhti