علم

علم کی وسعت کا کوئی بھی سرا ہوتا نہیں

علم کی کشتی کا کوئی ناخدا ہوتا نہیں

علم والوں کو مقدر سے گلہ ہوتا نہیں

علم والوں کا کوئی بھی جز خدا ہوتا نہیں

علم ہے تو در حقیقت آدمی ہے آدمی

علم ہے تو اس کی دنیا میں رہے گی روشنی

علم وہ شے ہے جسے کوئی چرا سکتا نہیں

چھیننا چاہے اسے کوئی تو پا سکتا نہیں

علم ہے تو زندگی کوئی دکھا سکتا نہیں

علم ہے تو آدمی دوزخ میں جا سکتا نہیں

علم ہی سے اب جہالت کو مٹایا جائے گا

علم سے آزاد ہندوستاں بنایا جائے گا

علم دنیائے جہالت میں ہے لاتا انقلاب

علم چمکاتا ہے ذروں کو بنا کر ماہتاب

علم سے عالم کا رخ جیسے شگفتہ ہو گلاب

علم ہی سے دور ہوتا ہے ہمیشہ پیچ و تاب

علم روشن کرتا ہے تاریکیوں کو اس طرح

راستہ بتلائے بجلی بادلوں میں جس طرح

جس کسی نے پا لیا ہے علم کا رنگین باغ

جس کسی نے علم کی راہوں کا پایا ہے سراغ

مستقل اس کے ارادے اس کا روشن ہے دماغ

آندھیاں بھی اب بجھا سکتی نہیں اس کا چراغ

عظمت علم و ہنر سے بڑھ کے کوئی شے نہیں

قدر و قیمت اہل فن کی ہر جگہ ہے ہر کہیں