کیف موسیقی

انگلیوں نے چھو دیا بربط کی دھن بہنے لگی

ابر موسیقی سے وہ چھن چھن کے یہ کہنے لگی

تھام لو دل کو جہاں مدہوش ہو جانے کو ہے

گود میں میری ابھی خاموش ہو جانے کو ہے

نغمہ کی پہلی کرن میں کھو گیا تار رباب

نیند سی آنے لگی سونے لگا میرا شباب

یک بیک دھارا سا اک بہنے لگا بے اختیار

بہہ چلا مانند دریا چھا گیا مثل بہار

راگنی کی دھار نے پھر چھو لیا دل کو مرے

سیل موسیقی نے پانی کر دیا دل کو مرے

کیف موسیقی نے پانی کر دیا دل کو مرے

کھو گئیں ابلیں بہیں بہہ کر تھمیں تھم کر بہیں

ایک دنیا مرتعش تھی موجۂ نغمات پر

اک عجب خوابیدگی طاری تھی کائنات پر

دور موسیقی میں دن تھا اور نہ تھی تخصیص شب

ایک وقت جاوداں اک عرصۂ موج طرب