مادر ہندوستاں

چمن کے ذرے ذرے سے صدا خوشیوں کی آتی ہے

کہ آزادی کے نغمے آج بلبل گنگناتی ہے

کلی کھل کر بہاروں کے چمن میں گیت گاتی ہے

چمن کیا آج تو ساری خدائی مسکراتی ہے

بہار آکر چمن میں اک نیا مژدہ سناتی ہے

زمانہ رقص میں ہے زندگی خوشیاں مناتی ہے

دیا خون جگر ہم نے تو گلشن میں بہار آئی

بہت مدت کے بعد آخر یہ جان انتظار آئی

دلوں کی بے قراری کا یہی لے کر قرار آئی

خوشا قسمت چمن میں عندلیب نغمہ بار آئی

یہ آزادی وطن میں اک نئی دنیا بساتی ہے

چمن میں اب جدھر دیکھو جوانی مسکراتی ہے

مگر اک مخمصے میں مادر ہندوستاں ہے آج

اسے درکار اہل ہند کا عزم جواں ہے آج

مٹانا دشمنوں کا دہر سے نام و نشاں ہے آج

کمر باندھے ہوئے بھارت کا ہر پیر و جواں ہے آج

ہے وہ نغمہ ہر اک لب پر کہ دھرتی چونک جاتی ہے

تری للکار سے رفعتؔ یہ دنیا تھرتھراتی ہے