پستیٔ افکار

مجبور نہیں فطرت آزاد تمہاری

پھر کیوں نہیں کرتے ہو غلامی کا جگر چاک

قدرت نے تمہیں اشرف مخلوق بنایا

کیوں خاک ہے یہ پستیٔ افکار سے نمناک

جو قوم ہو پستی کے خیالات پہ مائل

اس قوم کو حاصل نہیں پھر رفعت افلاک

کیوں گردش ایام کی کرتے ہو شکایت

کیوں وسعت آفاق میں ہوتے نہیں بے باک

انسان بھی آزاد ہے فطرت بھی ہے آزاد

کیوں رسم غلامی سے فضا ساری ہے ناپاک

صہباؔ تجھے اس قوم کا غم ہے جسے اپنی

حالت کے تغیر کا نہ احساس نہ ادراک