karte hain mazduri bachche jate nahin school

karte haiñ mazdūrī bachche jaate nahīñ schōl

is meñ un kī bhuul nahīñ hai ye hai baḌoñ kī bhuul

un kī hālat dekh ke dil se nikaltī hai ab haa.e

nanhe hāthoñ se gāhak ko jab vo pilā.eñ chaa.e

mazdūrī meñ un kā bachpan yūñhī biitā jaa.e

taaza havā kī jagah pe vo khāte haiñ gard aur dhuul

karte haiñ mazdūrī bachche jaate nahīñ schōl

workshop meñ jaate haiñ vo karne ke liye kaam

kaam meñ in kī sub.heñ guzreñ kaam meñ guzre shaam

zālim duniyā-dār haiñ in ko dete thoḌe daam

aaj kī is duniyā meñ kab hai koī ye ḳhuub usuul

karte haiñ mazdūrī bachche jaate nahīñ schōl

umr hai in kī khelne vaalī kheleñ kahāñ vo jā kar

paanī pī kar jī lete haiñ apnī bhuuk miTā kar

hafte baa'd bhī sau do-sau ko ḳhush hote haiñ pā kar

apnī ziist gañvā dete haiñ mazdūrī meñ fuzūl

karte haiñ mazdūrī bachche jaate nahīñ schōl

bachchoñ kī mazdūrī la.anat jurm ye ek baḌā hai

ik nāsūr hai jo apnī izzat kī rah meñ khaḌā hai

kaun hai jo is zulm ko roke jo har jā pe paḌā hai

bachchoñ ko madrase meñ bhejo mat do bahs ko tuul

karte hain mazduri bachche jate nahin school

is mein un ki bhul nahin hai ye hai baDon ki bhul

un ki haalat dekh ke dil se nikalti hai ab hae

nanhe hathon se gahak ko jab wo pilaen chae

mazduri mein un ka bachpan yunhi bita jae

taza hawa ki jagah pe wo khate hain gard aur dhul

karte hain mazduri bachche jate nahin school

workshop mein jate hain wo karne ke liye kaam

kaam mein in ki subhen guzren kaam mein guzre sham

zalim duniya-dar hain in ko dete thoDe dam

aaj ki is duniya mein kab hai koi ye KHub usul

karte hain mazduri bachche jate nahin school

umr hai in ki khelne wali khelen kahan wo ja kar

pani pi kar ji lete hain apni bhuk miTa kar

hafte ba'd bhi sau do-sau ko KHush hote hain pa kar

apni zist ganwa dete hain mazduri mein fuzul

karte hain mazduri bachche jate nahin school

bachchon ki mazduri lanat jurm ye ek baDa hai

ek nasur hai jo apni izzat ki rah mein khaDa hai

kaun hai jo is zulm ko roke jo har ja pe paDa hai

bachchon ko madrase mein bhejo mat do bahs ko tul