qaum se KHitab

sun mirī bāteñ zarā sun ai zalīl-o-ḳhvār qaum

ai vatan-dushman sitam-āzār ai ġhaddār qaum

be-navā be-rahm apnī jaan se bezār qaum

be-hamiyyat bad-nasīb ai muflis-o-nādār qaum

apnī hālat par tujhe ab sharm kyoñ aatī nahīñ

kyā ġharīb-āzāriyāñ bhī tujh ko taḌpātī nahīñ

jab nahīñ paatī hai khāne ko to piitī hai lahū

mardum-āzārī kī kartī hai talāsh-o-justujū

bhā.iyoñ se apne hī laḌtī hai tū ai tund-ḳhū

tujh meñ ab insāniyat kī bhī nahīñ baaqī hai bū

tū bahādur hai magar apne hī ghar ke vāste

tujh meñ himmat hai magar dīvār-o-dar ke vāste

be-hisī iflās aur buġhz-o-adāvat tujh meñ hai

ranjish-e-bejā-o-kīna aur nafrat tujh meñ hai

ġhair kī hamdard apnoñ se kudūrat tujh meñ hai

kyā batā.eñ tujh ko jo ai be-muravvat tujh meñ hai

tere jo ā'māl haiñ vo haiñ riyā ke vāste

bā-ḳhudā tujh meñ nahīñ koī ḳhudā ke vāste

dair-o-masjid chhoḌ shaiḳh-o-barhaman ke vāste

ġhuncha-o-gul vaqf kar ahl-e-chaman ke vāste

sham'-e-mahfil kar farozāñ anjuman ke vāste

tujh ko jo karnā hai kar apne vatan ke vāste

is se kuchh hāsil nahīñ vo sulh ho yā jang ho

tujh ko apne rang se matlab hai koī rang ho

bas yahī hai kufr terā aur yahī islām hai

bas yahī āġhāz terā aur yahī anjām hai

bas yahī tohfa hai terā aur yahī in'ām hai

bas yahī ik mudda'ā hai aur yahī paiġhām hai

gir rahā hai terā ghar hāthoñ pe is ko thaam le

vaqt 'ujlat kā hai jaldī uTh ḳhudā kā naam le

sun meri baaten zara sun ai zalil-o-KHwar qaum

ai watan-dushman sitam-azar ai ghaddar qaum

be-nawa be-rahm apni jaan se bezar qaum

be-hamiyyat bad-nasib ai muflis-o-nadar qaum

apni haalat par tujhe ab sharm kyon aati nahin

kya gharib-azariyan bhi tujh ko taDpati nahin

jab nahin pati hai khane ko to piti hai lahu

mardum-azari ki karti hai talash-o-justuju

bhaiyon se apne hi laDti hai tu ai tund-KHu

tujh mein ab insaniyat ki bhi nahin baqi hai bu

tu bahadur hai magar apne hi ghar ke waste

tujh mein himmat hai magar diwar-o-dar ke waste

be-hisi iflas aur bughz-o-adawat tujh mein hai

ranjish-e-beja-o-kina aur nafrat tujh mein hai

ghair ki hamdard apnon se kudurat tujh mein hai

kya bataen tujh ko jo ai be-murawwat tujh mein hai

tere jo aa'mal hain wo hain riya ke waste

ba-KHuda tujh mein nahin koi KHuda ke waste

dair-o-masjid chhoD shaiKH-o-barhaman ke waste

ghuncha-o-gul waqf kar ahl-e-chaman ke waste

sham'-e-mahfil kar farozan anjuman ke waste

tujh ko jo karna hai kar apne watan ke waste

is se kuchh hasil nahin wo sulh ho ya jang ho

tujh ko apne rang se matlab hai koi rang ho

bas yahi hai kufr tera aur yahi islam hai

bas yahi aaghaz tera aur yahi anjam hai

bas yahi tohfa hai tera aur yahi in'am hai

bas yahi ek mudda'a hai aur yahi paigham hai

gir raha hai tera ghar hathon pe is ko tham le

waqt 'ujlat ka hai jaldi uTh KHuda ka nam le