ai sharif insano

ḳhuun apnā ho yā parāyā ho

nasl-e-ādam kā ḳhuun hai āḳhir

jañg mashriq meñ ho ki maġhrib meñ

amn-e-ālam kā ḳhuun hai āḳhir

bam gharoñ par gireñ ki sarhad par

rūh-e-ta.amīr zaḳhm khātī hai

khet apne jaleñ ki auroñ ke

ziist fāqoñ se tilmilātī hai

tank aage baḌheñ ki pichhe haTeñ

kokh dhartī kī bāñjh hotī hai

fat.h kā jashn ho ki haar kā sog

zindagī mayyatoñ pe rotī hai

jañg to ḳhud hī ek mas.ala hai

jañg kyā mas.aloñ kā hal degī

aag aur ḳhuun aaj baḳhshegī

bhuuk aur ehtiyāj kal degī

is liye ai sharīf insāno

jañg Taltī rahe to behtar hai

aap aur ham sabhī ke āñgan meñ

sham.a jaltī rahe to behtar hai

2

bartarī ke subūt kī ḳhātir

ḳhuuñ bahānā hī kyā zarūrī hai

ghar kī tārīkiyāñ miTāne ko

ghar jalānā hī kyā zarūrī hai

jañg ke aur bhī to maidāñ haiñ

sirf maidān-e-kisht-o-ḳhūñ hī nahīñ

hāsil-e-zindagī ḳhirad bhī hai

hāsil-e-zindagī junūñ hī nahīñ

aao is tīra-baḳht duniyā meñ

fikr kī raushnī ko aam kareñ

amn ko jin se taqviyat pahuñche

aisī jañgoñ kā ehtimām kareñ

jañg vahshat se barbariyyat se

amn tahzīb o irtiqā ke liye

jañg marg-āfrīñ siyāsat se

amn insān kī baqā ke liye

jañg iflās aur ġhulāmī se

amn behtar nizām kī ḳhātir

jañg bhaTkī huī qayādat se

amn be-bas avaam kī ḳhātir

jañg sarmā.e ke tasallut se

amn jamhūr kī ḳhushī ke liye

jañg jañgoñ ke falsafe ke ḳhilāf

amn pur-amn zindagī ke liye

KHun apna ho ya paraya ho

nasl-e-adam ka KHun hai aaKHir

jang mashriq mein ho ki maghrib mein

amn-e-alam ka KHun hai aaKHir

bam gharon par giren ki sarhad par

ruh-e-tamir zaKHm khati hai

khet apne jalen ki auron ke

zist faqon se tilmilati hai

tank aage baDhen ki pichhe haTen

kokh dharti ki banjh hoti hai

fath ka jashn ho ki haar ka sog

zindagi mayyaton pe roti hai

jang to KHud hi ek masala hai

jang kya masalon ka hal degi

aag aur KHun aaj baKHshegi

bhuk aur ehtiyaj kal degi

is liye ai sharif insano

jang Talti rahe to behtar hai

aap aur hum sabhi ke aangan mein

shama jalti rahe to behtar hai

2

bartari ke subut ki KHatir

KHun bahana hi kya zaruri hai

ghar ki tarikiyan miTane ko

ghar jalana hi kya zaruri hai

jang ke aur bhi to maidan hain

sirf maidan-e-kisht-o-KHun hi nahin

hasil-e-zindagi KHirad bhi hai

hasil-e-zindagi junun hi nahin

aao is tira-baKHt duniya mein

fikr ki raushni ko aam karen

amn ko jin se taqwiyat pahunche

aisi jangon ka ehtimam karen

jang wahshat se barbariyyat se

amn tahzib o irtiqa ke liye

jang marg-afrin siyasat se

amn insan ki baqa ke liye

jang iflas aur ghulami se

amn behtar nizam ki KHatir

jang bhaTki hui qayaadat se

amn be-bas awam ki KHatir

jang sarmae ke tasallut se

amn jamhur ki KHushi ke liye

jang jangon ke falsafe ke KHilaf

amn pur-amn zindagi ke liye