urdu

zabān-e-hind hai urdu to māthe kī shikan kyuuñ hai

vatan meñ be-vatan kyuuñ hai

mirī mazlūm urdu terī sāñsoñ meñ ghuTan kyuuñ hai

terā lahja mahaktā hai to lafzoñ meñ thakan kyuuñ hai

agar tū phuul hai to phuul meñ itnī chubhan kyuuñ hai

vatan meñ be-vatan kyuuñ hai

ye 'nanak' kī ye 'ḳhusrav' kī 'dayā-shañkar' kī bolī hai

ye dīvālī ye baisākhī ye īd-ul-fitr holī hai

magar ye dil kī dhaḌkan āj-kal dil kī jalan kyuuñ hai

vatan meñ be-vatan kyuuñ hai

ye nāzoñ kī palī thī 'mīr' ke 'ġhālib' ke āñgan meñ

jo sūraj ban ke chamkī thī kabhī mahloñ ke dāman meñ

vo shahzādī zabānoñ kī yahāñ be-anjuman kyuuñ hai

vatan meñ be-vatan kyuuñ hai

mohabbat kā sabhī elaan kar jaate haiñ mahfil meñ

ki is ke vāste jazba hai hamdardī kā har dil meñ

magar haq māñgne ke vaqt ye begāna-pan kyuuñ hai

vatan meñ be-vatan kyuuñ hai

ye doshīza jo bāzāroñ se iThlātī guzartī thī

laboñ kī nāzukī jis kī gulāboñ sī bikhartī thī

jo tahzīboñ ke sar kī oḌhnī thī ab kafan kyuuñ hai

vatan meñ be-vatan kyuuñ hai

mohabbat kā agar da.avā hai to is ko bachāo tum

jo va.ada kal kiyā thā aaj vo va.ada nibhāo tum

agar tum raam ho to phir ye rāvan kā chalan kyuuñ hai

vatan meñ be-vatan kyuuñ hai

zaban-e-hind hai urdu to mathe ki shikan kyun hai

watan mein be-watan kyun hai

meri mazlum urdu teri sanson mein ghuTan kyun hai

tera lahja mahakta hai to lafzon mein thakan kyun hai

agar tu phul hai to phul mein itni chubhan kyun hai

watan mein be-watan kyun hai

ye 'nanak' ki ye 'KHusraw' ki 'daya-shankar' ki boli hai

ye diwali ye baisakhi ye id-ul-fitr holi hai

magar ye dil ki dhaDkan aaj-kal dil ki jalan kyun hai

watan mein be-watan kyun hai

ye nazon ki pali thi 'mir' ke 'ghaalib' ke aangan mein

jo suraj ban ke chamki thi kabhi mahlon ke daman mein

wo shahzadi zabanon ki yahan be-anjuman kyun hai

watan mein be-watan kyun hai

mohabbat ka sabhi elan kar jate hain mahfil mein

ki is ke waste jazba hai hamdardi ka har dil mein

magar haq mangne ke waqt ye begana-pan kyun hai

watan mein be-watan kyun hai

ye doshiza jo bazaron se iThlati guzarti thi

labon ki nazuki jis ki gulabon si bikharti thi

jo tahzibon ke sar ki oDhni thi ab kafan kyun hai

watan mein be-watan kyun hai

mohabbat ka agar dawa hai to is ko bachao tum

jo wada kal kiya tha aaj wo wada nibhao tum

agar tum ram ho to phir ye rawan ka chalan kyun hai

watan mein be-watan kyun hai