watan se KHitab

mujhe ai vatan tū zarā batā kidhar ab haiñ vo tirī san’ateñ

jo har ek mulk se laa.ī thiiñ tire paas khīñch ke daulateñ

tujhe muflisī na pasand thī tirī rāh-e-sa’ī na band thī

tirī himmat aisī buland thī ki nisār us pe thiiñ himmateñ

tirī koshishoñ se lagī thī lau usī lau se phail rahī thī zau

hue sust mulk bhī garm-rau tirī dekh dekh ke mehnateñ

tirī san'atoñ meñ vo rang thā ki fidā har ahl-e-farang thā

jinheñ dekh baaġh bhī dang thā vo huī thiiñ un pe riyāzateñ

gayā jab badal vo tirā chalan na rahā vo 'ilm tirā na fan

ga.iiñ tujh se chhin vo ab ai vatan jo ḳhudā ne dī thiiñ liyāqateñ

huī muntashir vo tirī sabhā jo har ik hunar se thī āshnā

jo har ek 'ilm pe thī fidā huī ḳhatm jis pe fazīlateñ

na rahā vo 'ilm kā ab samāñ na vo san'atoñ kā rahā nishāñ

na rahī vo daulat-e-shā.egāñ huiiñ duur ab vo sa’ādateñ

agar ab bhī garm-e-‘ināñ ho tū rah-e-sarvarī pe ravāñ ho tū

to phir iftiḳhār-e-jahāñ ho tū tujhe phir mileñ vahī 'izzateñ

agar ab bhī terā baḌhe qadam tire sar pe 'ilm kā ho 'alam

vahī jaah phir ho vahī hasham vahī daulateñ vahī sarvateñ

agar ab bhī dauḌ ke chār-sū kare taaza san’ateñ apnī tū

to baḌhe vo phir tirī aabrū ki hoñ mahv saarī ye zillateñ

na.ī san'atoñ kī bhī le ḳhabar ki tire chaman meñ hoñ sab shajar

tirī uñgliyoñ meñ hoñ sab hunar tirī arġhanūñ meñ hoñ sab gateñ

yahī aarzū hai ab ai vatan ki shagufta phir ho tirā chaman

tirā baḳht phir ho ziyā-fagan tirī duur sab hoñ ye kulfateñ

mujhe ai watan tu zara bata kidhar ab hain wo teri san’aten

jo har ek mulk se lai thin tere pas khinch ke daulaten

tujhe muflisi na pasand thi teri rah-e-sa’i na band thi

teri himmat aisi buland thi ki nisar us pe thin himmaten

teri koshishon se lagi thi lau usi lau se phail rahi thi zau

hue sust mulk bhi garm-rau teri dekh dekh ke mehnaten

teri san'aton mein wo rang tha ki fida har ahl-e-farang tha

jinhen dekh bagh bhi dang tha wo hui thin un pe riyazaten

gaya jab badal wo tera chalan na raha wo 'ilm tera na fan

gain tujh se chhin wo ab ai watan jo KHuda ne di thin liyaqaten

hui muntashir wo teri sabha jo har ek hunar se thi aashna

jo har ek 'ilm pe thi fida hui KHatm jis pe fazilaten

na raha wo 'ilm ka ab saman na wo san'aton ka raha nishan

na rahi wo daulat-e-shaegan huin dur ab wo sa’adaten

agar ab bhi garm-e-‘inan ho tu rah-e-sarwari pe rawan ho tu

to phir iftiKHar-e-jahan ho tu tujhe phir milen wahi 'izzaten

agar ab bhi tera baDhe qadam tere sar pe 'ilm ka ho 'alam

wahi jah phir ho wahi hasham wahi daulaten wahi sarwaten

agar ab bhi dauD ke chaar-su kare taza san’aten apni tu

to baDhe wo phir teri aabru ki hon mahw sari ye zillaten

nai san'aton ki bhi le KHabar ki tere chaman mein hon sab shajar

teri ungliyon mein hon sab hunar teri arghanun mein hon sab gaten

yahi aarzu hai ab ai watan ki shagufta phir ho tera chaman

tera baKHt phir ho ziya-fagan teri dur sab hon ye kulfaten