yaqin se yaadon ke bare mein kuchh kaha nahin ja sakta

tum ne jo phuul mujhe ruḳhsat hote vaqt diyā thā

vo nazm maiñ ne tumhārī yādoñ ke saath lifāfe meñ band kar ke rakh dī thī

aaj dinoñ baad bahut akele maiñ use khol kar dekhā hai

phuul kī nau pañkhuḌiyāñ haiñ

nazm ke nau misre

yādeñ bhī kaisī ajiib hotī haiñ

pahlī pañkhuḌī yaad dilātī hai us lamhe kī jab maiñ ne

pahlī baar tumheñ bharī mahfil meñ apnī taraf musalsal takte hue dekh liyā thā

dūsrī pañkhuḌī jab ham pahlī baar ek dūsre ko kuchh kahe baġhair

bas yūñhī jaan buujh kar nazar bachāte hue ek rāhdārī se guzar ga.e the

phir tīsrī baar jab ham āchānak ek moḌ par kahīñ mile

aur ham ne bahut saarī bāteñ kiiñ aur bahut saare baras

ek saath pal meñ guzār diye

aur chauthī baar

ab maiñ bhūlne lagā huuñ

bahut dinoñ se Thahrī huī udāsī keī vajah se shāyad

kuchh log kahte haiñ udāsī tanhā.ī keī kokh se janam letī hai

mumkin hai Thiik kahte hoñ

kuchh log kahte haiñ bahut tanhā rahnā bhī udāsī kā sabab ban jaatā hai

mumkin hai ye bhī Thiik ho

mumkin hai tum aao to bhūlī huī saarī bāteñ phir se yaad aa jaa.eñ

mumkin hai tum aao to vo bāteñ bhī maiñ bhuul chukā huuñ jo abhī mujhe yaad haiñ

yādoñ ke baare meñ aur udāsī ke baare meñ aur tanhā.ī ke baare meñ

koī baat yaqīn se nahīñ kahī jā saktī

tum ne jo phul mujhe ruKHsat hote waqt diya tha

wo nazm main ne tumhaari yaadon ke sath lifafe mein band kar ke rakh di thi

aaj dinon baad bahut akele main use khol kar dekha hai

phul ki nau pankhuDiyan hain

nazm ke nau misre

yaaden bhi kaisi ajib hoti hain

pahli pankhuDi yaad dilati hai us lamhe ki jab main ne

pahli bar tumhein bhari mahfil mein apni taraf musalsal takte hue dekh liya tha

dusri pankhuDi jab hum pahli bar ek dusre ko kuchh kahe baghair

bas yunhi jaan bujh kar nazar bachate hue ek rahdari se guzar gae the

phir tisri bar jab hum aachanak ek moD par kahin mile

aur hum ne bahut sari baaten kin aur bahut sare baras

ek sath pal mein guzar diye

aur chauthi bar

ab main bhulne laga hun

bahut dinon se Thahri hui udasi kei wajah se shayad

kuchh log kahte hain udasi tanhai kei kokh se janam leti hai

mumkin hai Thik kahte hon

kuchh log kahte hain bahut tanha rahna bhi udasi ka sabab ban jata hai

mumkin hai ye bhi Thik ho

mumkin hai tum aao to bhuli hui sari baaten phir se yaad aa jaen

mumkin hai tum aao to wo baaten bhi main bhul chuka hun jo abhi mujhe yaad hain

yaadon ke bare mein aur udasi ke bare mein aur tanhai ke bare mein

koi baat yaqin se nahin kahi ja sakti