تجھے کچھ عشق و الفت کے سوا بھی یاد ہے اے دل

سنائے جا رہا ہے ایک ہی افسانہ برسوں سے

جو انہیں وفا کی سوجھی تو نہ زیست نے وفا کی

ابھی آ کے وہ نہ بیٹھے کہ ہم اٹھ گئے جہاں سے

عشق ہے بے گداز کیوں حسن ہے بے نیاز کیوں

میری وفا کہاں گئی ان کی جفا کو کیا ہوا

حال دل سن کے وہ آزردہ ہیں شاید ان کو

اس حکایت پہ شکایت کا گماں گزرا ہے

چراغ زندگی ہوگا فروزاں ہم نہیں ہوں گے

چمن میں آئے گی فصل بہاراں ہم نہیں ہوں گے

ہمارے ڈوبنے کے بعد ابھریں گے نئے تارے

جبین دہر پر چھٹکے گی افشاں ہم نہیں ہوں گے

اب نہیں جنت مشام کوچہ یار کی شمیم

نکہت زلف کیا ہوئی باد صبا کو کیا ہوا

مرے دل میں ہے کہ پوچھوں کبھی مرشد مغاں سے

کہ ملا جمال ساقی کو یہ طنطنہ کہاں سے

نئی شمعیں جلاؤ عاشقی کی انجمن والو

کہ سونا ہے شبستان دل پروانہ برسوں سے