جس کو خود اپنا اعتبار نہ ہو

ایسے انساں کا اعتبار نہ کر

لوگ تجھ کو حقیر سمجھیں گے

حد سے زائد بھی انکسار نہ کر

بے ربطیوں نے قدرؔ مٹائی جو ربط کی

ہے گوشت کو بھی اپنے نہ اب استخواں سے ربط

دنیا کو ہم سے کام نہ دنیا سے ہم کو کام

خاطر سے تیری رکھتے ہیں سارے جہاں سے ربط

توڑا نہیں جا سکتا پیمان محبت کا

نقصان خود اپنا ہے نقصان محبت کا

کیوں عشق کے جھگڑے کو لے جاتا ہے عقبیٰ میں

کر خاتمہ دنیا میں دنیا کی مصیبت کا

خاموش اس طرح سے نہ جل کر دھواں اٹھا

اے شمع کچھ تو بول کبھی تو زباں اٹھا

میں یہ کہتا ہوں کہ دونوں میں ضروری لاگ ہے

وہ یہ کہتے ہیں زمیں کو آسماں سے کیا غرض

اظہار حال کے لئے صورت سوال ہے

ہے گفتگو سے کام نہ ہم کو زباں سے ربط

آتی ہے نظر اس میں اخلاص کی ہر صورت

آئینہ ہے آئینہ انسان محبت کا

نالۂ بے صوت خود بننے لگا مہر سکوت

بے زبانی کو ہماری اب زباں سے کیا غرض