aa kar phira na nam ko aankhon mein KHwab-e-shab

aa kar phirā na naam ko āñkhoñ meñ ḳhvāb-e-shab

kyā kyā rahā hai dil ko mire iztirāb-e-shab

vaañ us ne jām-e-mai diye ġhairoñ ko aur yaañ

chhalkā kiyā hai kāsa-e-chashm-e-pur-āb-e-shab

māñgā jo ek bosa to bole ki raah lo

ik umr meñ diyā to diyā ye javāb-e-shab

us ruḳh ko dekh bahr-e-ḳhajālat meñ kuchh na pūchh

sharminda ho ke Duub gayā māhtāb-e-shab

sargarm-e-nāz dekh ke ġhairoñ ke saath use

jal-bhun ke ho gayā dil-e-shaidā kabāb-e-shab

kal sub.h tak thiiñ aap kī āñkheñ jhukī huiiñ

sach kahiye kis ke haath se pī thī sharāb-e-shab

zulf-e-butāñ kī yaad meñ ai 'aish' kyā kahūñ

dil ne mire uThā.e haiñ kyā pech-o-tāb-e-shab

aa kar phira na nam ko aankhon mein KHwab-e-shab

kya kya raha hai dil ko mere iztirab-e-shab

wan us ne jam-e-mai diye ghairon ko aur yan

chhalka kiya hai kasa-e-chashm-e-pur-ab-e-shab

manga jo ek bosa to bole ki rah lo

ek umr mein diya to diya ye jawab-e-shab

us ruKH ko dekh bahr-e-KHajalat mein kuchh na puchh

sharminda ho ke Dub gaya mahtab-e-shab

sargarm-e-naz dekh ke ghairon ke sath use

jal-bhun ke ho gaya dil-e-shaida kabab-e-shab

kal subh tak thin aap ki aankhen jhuki huin

sach kahiye kis ke hath se pi thi sharab-e-shab

zulf-e-butan ki yaad mein ai 'aish' kya kahun

dil ne mere uThae hain kya pech-o-tab-e-shab