azab raaton KHizan-ruton ki kahani likkhun

azaab rātoñ ḳhizāñ-rutoñ kī kahānī likkhūñ

maiñ terī furqat kī sā.atoñ ko zabānī likkhūñ

bas ek pākīza rabt hai rūh-o-jāñ kā tujh se

to phir maiñ is saare vāqiye ko gumānī likkhūñ

mujhe mayassar haiñ saare rishte vahī nahīñ hai

bhalā maiñ kis dil se shauq kī rā.egānī likkhūñ

duā sunā hai falak pe jā ke aTak ga.ī hai

so tujh ko paane kī kyā yūñhī ḳhush-gumānī likkhūñ

jo bah rahe haiñ mirī ragoñ meñ haiñ ashk mere

bhalā maiñ kaise lahū kī apne ravānī likkhūñ

kabhī jo dariyā chaḌhā thā dil kā utar chukā hai

to kyā maiñ jazbāt ke talātum ko faanī likkhūñ

ye mere jīvan ke saare mausam batā rahe haiñ

maiñ apne āñgan ke har shajar kī javānī likkhūñ

yam-e-tarab aur na e'tibār-e-junūñ rahā hai

so ishq mere tujhe maiñ ḳhuld-āshiyānī likkhūñ

havās-e-ḳhamsa kā silsila bhī yahīñ talak hai

falak zamīñ ke jo darmiyāñ hai makānī likkhūñ

nahīñ gayā vo kahīñ bhī 'anjum' yahīñ kahīñ hai

maiñ shauq kī sab ishāratoñ ke ma.ānī likkhūñ

azab raaton KHizan-ruton ki kahani likkhun

main teri furqat ki saaton ko zabani likkhun

bas ek pakiza rabt hai ruh-o-jaan ka tujh se

to phir main is sare waqiye ko gumani likkhun

mujhe mayassar hain sare rishte wahi nahin hai

bhala main kis dil se shauq ki raegani likkhun

dua suna hai falak pe ja ke aTak gai hai

so tujh ko pane ki kya yunhi KHush-gumani likkhun

jo bah rahe hain meri ragon mein hain ashk mere

bhala main kaise lahu ki apne rawani likkhun

kabhi jo dariya chaDha tha dil ka utar chuka hai

to kya main jazbaat ke talatum ko fani likkhun

ye mere jiwan ke sare mausam bata rahe hain

main apne aangan ke har shajar ki jawani likkhun

yam-e-tarab aur na e'tibar-e-junun raha hai

so ishq mere tujhe main KHuld-ashiyani likkhun

hawas-e-KHamsa ka silsila bhi yahin talak hai

falak zamin ke jo darmiyan hai makani likkhun

nahin gaya wo kahin bhi 'anjum' yahin kahin hai

main shauq ki sab ishaaraton ke maani likkhun