badan ki mauj mein angDaiyan ulajh jaen

badan kī mauj meñ añgḌā.iyāñ ulajh jaa.eñ

tilism aisā ki bīnā.iyāñ ulajh jaa.eñ

jo tere paañv kī bikhrī ho ḳhaak rāhoñ meñ

vahāñ se guzreñ to parchhā.iyāñ ulajh jaa.eñ

khulī ho zulf to sar par dupaTTā rakh lenā

na aisā ho kahīñ purvā.iyāñ ulajh jaa.eñ

zabān-e-ishq jo kholeñ kahīñ pe sannāTe

baḌe baḌoñ kī bhī dānā.iyāñ ulajh jaa.eñ

nigāh duur hī rakkho hamāre zaḳhmoñ se

jo in ko dekheñ to gahrā.iyāñ ulajh jaa.eñ

majāz Thiik hai dil ke taḌapte rahne kā

hamārī mauj meñ tanhā.iyāñ ulajh jaa.eñ

ilaaj ishq kā karne jo aa.e chāragar

maraz meñ saarī masīhā.iyāñ ulajh jaa.eñ

uruuj saare badal jaate haiñ zavāloñ meñ

agarche paañv se rusvā.iyāñ ulajh jaa.eñ

suneñ ye dil se mire dard kī azaan agar

'nadīm' aap kī shahnā.iyāñ ulajh jaa.eñ

badan ki mauj mein angDaiyan ulajh jaen

tilism aisa ki binaiyan ulajh jaen

jo tere panw ki bikhri ho KHak rahon mein

wahan se guzren to parchhaiyan ulajh jaen

khuli ho zulf to sar par dupaTTa rakh lena

na aisa ho kahin purwaiyan ulajh jaen

zaban-e-ishq jo kholen kahin pe sannaTe

baDe baDon ki bhi danaiyan ulajh jaen

nigah dur hi rakkho hamare zaKHmon se

jo in ko dekhen to gahraiyan ulajh jaen

majaz Thik hai dil ke taDapte rahne ka

hamari mauj mein tanhaiyan ulajh jaen

ilaj ishq ka karne jo aae chaaragar

maraz mein sari masihaiyan ulajh jaen

uruj sare badal jate hain zawalon mein

agarche panw se ruswaiyan ulajh jaen

sunen ye dil se mere dard ki azan agar

'nadim' aap ki shahnaiyan ulajh jaen