chaTTan

bachpan se maañ kī dī huī

siikh par chalī huuñ maiñ

aaj bhī chal rahī huuñ

aur aage bhī chalnā chāhtī huuñ

par kabhī kabhī mahsūs hotā hai

thakan kā ek bojh apne dil aur dimāġh par

aksar zehn meñ uThte haiñ ka.ī savāl

kyā hāsil honā hai mujhe is raah par

kab tak yuuñ hī chaltī rahūñgī

apne chāroñ jānib jab dekhtī huuñ

jhuuT kī ūñchī imārateñ

to ḳhayāl aatā hai

merā sach to sahrā meñ uḌtī

ḳhaak sā hai

merā vajūd yak-ba-yak anāsir kā Dher lagtā hai

aur maiñ ḳhud se hī ghabrā jaatī huuñ saham jaatī huuñ

phir yaad aatī hai

maañ kī bachpan meñ dī huī siikh

saphal vahī hote haiñ jo sachche hote hai

ye ḳhayāl aate hī na.e josh meñ

apne thake bikhre TuuTe badan ko sameT kar

ḳhaak se chaTTān kī shakl iḳhtiyār kartī huuñ

aur tayyār kartī huuñ ḳhud ko ek baar phir

jhuuT kī imāratoñ se jañg karne ke liye

bachpan se man ki di hui

sikh par chali hun main

aaj bhi chal rahi hun

aur aage bhi chalna chahti hun

par kabhi kabhi mahsus hota hai

thakan ka ek bojh apne dil aur dimagh par

aksar zehn mein uThte hain kai sawal

kya hasil hona hai mujhe is rah par

kab tak yun hi chalti rahungi

apne chaaron jaanib jab dekhti hun

jhuT ki unchi imaraten

to KHayal aata hai

mera sach to sahra mein uDti

KHak sa hai

mera wajud yak-ba-yak anasir ka Dher lagta hai

aur main KHud se hi ghabra jati hun saham jati hun

phir yaad aati hai

man ki bachpan mein di hui sikh

saphal wahi hote hain jo sachche hote hai

ye KHayal aate hi nae josh mein

apne thake bikhre TuTe badan ko sameT kar

KHak se chaTTan ki shakl iKHtiyar karti hun

aur tayyar karti hun KHud ko ek bar phir

jhuT ki imaraton se jang karne ke liye