hubb-e-watan

ai vatan ai mire bahisht-e-barīñ

kyā hue tere āsmān zamīñ

raat aur din kā vo samāñ na rahā

vo zamīñ aur vo āsmāñ na rahā

sach batā tū sabhī ko bhātā hai

yā ki mujh se hī terā naatā hai

maiñ hī kartā huuñ tujh pe jān-nisār

yā ki duniyā hai terī āshiq-e-zār

kyā zamāne ko tū aziiz nahīñ

ai vatan tū to aisī chiiz nahīñ

jinn-o-insān kī hayāt hai tū

murġh-o-māhī kī kā.enāt hai tū

hai nabātāt kā numū tujh se

ruukh tujh bin hare nahīñ hote

sab ko hotā hai tujh se nash-o-numā

sab ko bhātī hai terī āb-o-havā

terī ik musht-e-ḳhāk ke badle

luuñ na hargiz agar bahisht mile

jaan jab tak na ho badan se judā

koī dushman na ho vatan se judā

baiThe be-fikr kyā ho ham-vatano

uTTho ahl-e-vatan ke dost bano

tum agar chāhte ho mulk kī ḳhair

na kisī ham-vatan ko samjho ġhair

hoñ musalmān is meñ yā hindū

bodh maz.hab ho yā ki ho brahamū

sab ko mīThī nigāh se dekho

samjho āñkhoñ kī putliyāñ sab ko

mulk haiñ ittifāq se āzād

shahr haiñ ittifāq se ābād

hind meñ ittifāq hotā agar

khāte ġhairoñ kī Thokareñ kyūñkar

qaum jab ittifāq kho baiThī

apnī pūñjī se haath dho baiThī

ek kā ek ho gayā bad-ḳhvāh

lagī ġhairoñ kī tum pe paḌne nigāh

phir ga.e bhā.iyoñ se jab bhaa.ī

jo na aanī thī vo balā aa.ī

paañv iqbāl ke ukhaḌne lage

mulk par sab ke haath paḌne lage

kabhī tūrāniyoñ ne ghar luuTā

kabhī durrāniyoñ ne zar luuTā

kabhī nādir ne qatl-e-ām kiyā

kabhī mahmūd ne ġhulām kiyā

sab se āḳhir ko le ga.ī baazī

ek shā.ista qaum maġhrib kī

mulk rauñde ga.e haiñ pairoñ se

chain kis ko milā hī ġhairoñ se

chhoḌo afsurdagī ko josh meñ aao

bas bahut so.e uTTho hosh meñ aao

qāfile tum se baḌh ga.e kosoñ

rahe jaate ho sab se pīchhe kyuuñ

qāfiloñ se agar milā chāho

mulk aur qaum kā bhalā chāho

gar rahā chāhte ho izzat se

bhā.iyoñ ko nikālo zillat se

qaum kā mubtazil hai jo insāñ

be-haqīqat hai garche hai sultāñ

qaum duniyā meñ jis kī hai mumtāz

ho faqīrī meñ bhī vo bā-e.azāz

izzat-e-qaum chāhte ho agar

jā ke phailāo in meñ ilm-o-hunar

zaat kā faḳhr aur nasab kā ġhurūr

uTh ga.e ab jahāñ se ye dastūr

ab na sayyad kā iftiḳhār sahīh

na barahman ko shudr par tarjīh

qaum kī izzat ab hunar se hai

ilm se yā ki sīm-o-zar se hai

koī din meñ vo daur aa.egā

be-hunar bhiik tak na pā.egā

na raheñge sadā yahī din-rāt

yaad rakhnā hamārī aaj kī baat

gar nahīñ sunte qaul 'hālī' kā

phir na kahnā ki koī kahtā thā

ai watan ai mere bahisht-e-barin

kya hue tere aasman zamin

raat aur din ka wo saman na raha

wo zamin aur wo aasman na raha

sach bata tu sabhi ko bhata hai

ya ki mujh se hi tera nata hai

main hi karta hun tujh pe jaan-nisar

ya ki duniya hai teri aashiq-e-zar

kya zamane ko tu aziz nahin

ai watan tu to aisi chiz nahin

jinn-o-insan ki hayat hai tu

murgh-o-mahi ki kaenat hai tu

hai nabaatat ka numu tujh se

rukh tujh bin hare nahin hote

sab ko hota hai tujh se nash-o-numa

sab ko bhati hai teri aab-o-hawa

teri ek musht-e-KHak ke badle

lun na hargiz agar bahisht mile

jaan jab tak na ho badan se juda

koi dushman na ho watan se juda

baiThe be-fikr kya ho ham-watano

uTTho ahl-e-watan ke dost bano

tum agar chahte ho mulk ki KHair

na kisi ham-watan ko samjho ghair

hon musalman is mein ya hindu

bodh mazhab ho ya ki ho brahamu

sab ko miThi nigah se dekho

samjho aankhon ki putliyan sab ko

mulk hain ittifaq se aazad

shahr hain ittifaq se aabaad

hind mein ittifaq hota agar

khate ghairon ki Thokaren kyunkar

qaum jab ittifaq kho baiThi

apni punji se hath dho baiThi

ek ka ek ho gaya bad-KHwah

lagi ghairon ki tum pe paDne nigah

phir gae bhaiyon se jab bhai

jo na aani thi wo bala aai

panw iqbaal ke ukhaDne lage

mulk par sab ke hath paDne lage

kabhi turaniyon ne ghar luTa

kabhi durraniyon ne zar luTa

kabhi nadir ne qatl-e-am kiya

kabhi mahmud ne ghulam kiya

sab se aaKHir ko le gai bazi

ek shaista qaum maghrib ki

mulk raunde gae hain pairon se

chain kis ko mila hi ghairon se

chhoDo afsurdagi ko josh mein aao

bas bahut soe uTTho hosh mein aao

qafile tum se baDh gae koson

rahe jate ho sab se pichhe kyun

qafilon se agar mila chaho

mulk aur qaum ka bhala chaho

gar raha chahte ho izzat se

bhaiyon ko nikalo zillat se

qaum ka mubtazil hai jo insan

be-haqiqat hai garche hai sultan

qaum duniya mein jis ki hai mumtaz

ho faqiri mein bhi wo ba-eazaz

izzat-e-qaum chahte ho agar

ja ke phailao in mein ilm-o-hunar

zat ka faKHr aur nasab ka ghurur

uTh gae ab jahan se ye dastur

ab na sayyad ka iftiKHar sahih

na barahman ko shudr par tarjih

qaum ki izzat ab hunar se hai

ilm se ya ki sim-o-zar se hai

koi din mein wo daur aaega

be-hunar bhik tak na paega

na rahenge sada yahi din-raat

yaad rakhna hamari aaj ki baat

gar nahin sunte qaul 'haali' ka

phir na kahna ki koi kahta tha