namaz paDh paDh ke tu gunahon se apne tauba bua kiya kar

namāz paḌh paḌh ke tū gunāhoñ se apne tauba buā kiyā kar

na jaan hindū pe de dogānā ḳhudā ḳhudā kar ḳhudā ḳhudā kar

na dekh dūlhā ko saas nandoñ ke aage ghūñghaT uThā uThā kar

na.ī-navelī dulhan hai bachchī abhī to do chaar din hayā kar

vabāl jiinā hai dam ulajhtā hai kyā karūñ baal maiñ baḌhā kar

jo apne āshiq the chal base uuhī mujh ko janjāl meñ phañsā kar

nikāhī-bayāhī ko chhoḌ baiThe matā.ī ranDī ko ghar meñ Daalā

banāyā sāhab imam-bāḌā ḳhudā kī masjid ko tum ne Dhā kar

vo ek din thā ki mere aage kabhī na us kī thī daal galtī

bhare haiñ gāloñ pe ab to chāval kare vo bāteñ chabā chabā kar

kareñ na mujh pe vo farq itnā kuchh un ke ghar meñ paḌī nahīñ huuñ

karoḌoñ aise bigāḌ Daale gharauñde maiñ ne banā banā kar

ye Dar hai jappī kī tarah sar par na tere chaḌh baiThe choTī vaalā

kuñvārī baalī hai motī-begam na baal khole hue phirā kar

lagā.ī sosan ne aisī missī ki jaise battaḳh ne khaa.ī kīchaḌ

kisī ne maarā hai muñh pe patthar nahīñ ye aa.ī hai paan khā kar

vo baat aglī na yaad rakkhī abhī se bhūle hamārī chāhat

mujhe na khonī thī apnī izzat tumhārī dam-bāziyoñ meñ aa kar

sivā tumhāre kisī se maiñ ne na rakh ke roTī pe boTī khaa.ī

agar na maano uThā luuñ tīsoñ kalām sāhab abhī mañgā kar

gayā thā gañgā mahājan aate hī pahuñchā bāle-miyāñ ke mele

na Taale baale banāo sāhab mañgā do baale mire chhuḌā kar

nasīb sīdhā agar hai merā lachaktī niklegī khaaT us kī

vo maTkka na pā.egī jis ne bhejā hai ulTī palTī tumheñ paḌhā kar

jo dukh uThāne kī thī na tāqat huī thī raazī vo kach-dilī kyuuñ

zalīl us ko bhī saath apne kiyā zanāḳhī ne ġhul machā kar

judā.ī us kī to ek-dam kī nahīñ gavārā hai mujh ko logo

tamām kumbe ko chhoḌ baiThī maiñ 'jān'-sāhab se dil lagā kar

namaz paDh paDh ke tu gunahon se apne tauba bua kiya kar

na jaan hindu pe de dogana KHuda KHuda kar KHuda KHuda kar

na dekh dulha ko sas nandon ke aage ghunghaT uTha uTha kar

nai-naweli dulhan hai bachchi abhi to do chaar din haya kar

wabaal jina hai dam ulajhta hai kya karun baal main baDha kar

jo apne aashiq the chal base uhi mujh ko janjal mein phansa kar

nikahi-bayahi ko chhoD baiThe matai ranDi ko ghar mein Dala

banaya sahab imam-baDa KHuda ki masjid ko tum ne Dha kar

wo ek din tha ki mere aage kabhi na us ki thi dal galti

bhare hain galon pe ab to chawal kare wo baaten chaba chaba kar

karen na mujh pe wo farq itna kuchh un ke ghar mein paDi nahin hun

karoDon aise bigaD Dale gharaunde main ne bana bana kar

ye Dar hai jappi ki tarah sar par na tere chaDh baiThe choTi wala

kunwari baali hai moti-begam na baal khole hue phira kar

lagai sosan ne aisi missi ki jaise battaKH ne khai kichaD

kisi ne mara hai munh pe patthar nahin ye aai hai pan kha kar

wo baat agli na yaad rakkhi abhi se bhule hamari chahat

mujhe na khoni thi apni izzat tumhaari dam-baziyon mein aa kar

siwa tumhaare kisi se main ne na rakh ke roTi pe boTi khai

agar na mano uTha lun tison kalam sahab abhi manga kar

gaya tha ganga mahajan aate hi pahuncha baale-miyan ke mele

na Tale baale banao sahab manga do baale mere chhuDa kar

nasib sidha agar hai mera lachakti niklegi khaT us ki

wo maTkka na paegi jis ne bheja hai ulTi palTi tumhein paDha kar

jo dukh uThane ki thi na taqat hui thi raazi wo kach-dili kyun

zalil us ko bhi sath apne kiya zanaKHi ne ghul macha kar

judai us ki to ek-dam ki nahin gawara hai mujh ko logo

tamam kumbe ko chhoD baiThi main 'jaan'-sahab se dil laga kar