ساون شاعری

رہتی ہے شب و روز میں بارش سی تری یاد

خوابوں میں اتر جاتی ہیں گھنگھور سی آنکھیں

ہم سے پوچھو مزاج بارش کا

ہم جو کچے مکان والے ہیں

یہ بارش کب رکے گی کون جانے

کہیں میں مر نہ جاؤں تشنگی سے

نفس نفس پہ یہاں رحمتوں کی بارش ہے

ہے بد نصیب جسے زندگی نہ راس آئی

کل ترے احساس کی بارش تلے

میرا سونا پن نہایا دیر تک

پڑے ہیں نفرت کے بیچ دل میں برس رہا ہے لہو کا ساون

ہری بھری ہیں سروں کی فصلیں بدن پہ زخموں کے گل کھلے ہیں

یہ حسن نو بہار یہ ساون کی بدلیاں

پینا ہے فرض اور نہ پینا حرام آج

رکی رکی سی ہے برسات خشک ہے ساون

یہ اور بات کہ موسم یہی نمو کا ہے

میں چپ کراتا ہوں ہر شب امڈتی بارش کو

مگر یہ روز گئی بات چھیڑ دیتی ہے

وہ ترے نصیب کی بارشیں کسی اور چھت پہ برس گئیں

دل بے خبر مری بات سن اسے بھول جا اسے بھول جا

ہو لینے دو بارش ہم بھی رو لیں گے

دل میں ہیں کچھ زخم پرانے دھو لیں گے

ساون کی اس رم جھم میں

بھیگ رہا ہے تنہا چاند

برسات کا بادل تو دیوانہ ہے کیا جانے

کس راہ سے بچنا ہے کس چھت کو بھگونا ہے

اب کے ساون میں شرارت یہ مرے ساتھ ہوئی

میرا گھر چھوڑ کے کل شہر میں برسات ہوئی

یاد آئی وہ پہلی بارش

جب تجھے ایک نظر دیکھا تھا

بارش شراب عرش ہے یہ سوچ کر عدمؔ

بارش کے سب حروف کو الٹا کے پی گیا

شوخیاں معصومیت اسکول جھولا بارشیں

کتنی یادیں ساتھ لایا جب کوئی بچھڑا ملا

برس رہی تھی بارش باہر

اور وہ بھیگ رہا تھا مجھ میں

بارش کی بہت تیز ہوا میں کہیں مجھ کو

درپیش تھا اک مرحلہ جلنے کی طرح کا

ساون ایک مہینے قیصرؔ آنسو جیون بھر

ان آنکھوں کے آگے بادل بے اوقات لگے